ឥណ្ឌូនេស៊ី៖ ប្រទេសឥណ្ឌូនេស៊ី អាចនឹងប្រឈមការវាយប្រហារពីរលកយក្សស៊ូណាមិ ក្រោយកើតមានគ្រោះរញ្ជួយដីកម្រិតខ្លាំង ៦,៩រ៉ិចទ័រ កាលពីយប់ថ្ងៃអាទិត្យ ទី៧ កក្កដា ឆ្នាំ២០១៩ ម្សិលមិញនេះ។
បើយោងតាមប្រភពសារព័ត៌មាន បានរាយការណ៍ឲ្យដឹងថា រញ្ជួយដីកម្រិត ៦,៩រ៉ិចទ័រនេះ បានវាយប្រហារក្នុងជម្រៅ ២៤គីឡូម៉ែត្រក្នុងសមុទ្រ Molucca ដែលស្ថិតនៅចន្លោះកោះ Maluku និង Sulawesi (ទីក្រុង Manado និង Ternate) ជាមួយនឹងកម្លាំងរលកបោកបក់វាយប្រហារកម្ពស់ប្រហែលជាងកន្លះម៉ែត្រ។
គ្រោះធម្មជាតិដ៏គួរឲ្យភ័យខ្លាចនេះ ក៏បានធ្វើឲ្យប្រជាជនជាច្រើនដែលរស់នៅក្នុងទីក្រុង Ternate មានការភ័យតក់ស្លុតយ៉ាងខ្លាំង និងបានរត់ជម្លៀសខ្លួនចេញ ដើម្បីរកទីទួលសុវត្ថិភាពផងដែរ។
អ្នកស្រុកម្នាក់ឈ្មោះ Budi Nurgianto បាននិយាយថា «ខ្ញុំកំពុងតែរៀបនឹងគេង នៅពេលនោះក៏ស្រាប់តែបង្អួចផ្ទះរបស់ខ្ញុំ ចាប់ផ្តើមរង្គោះរង្គើតែម្តង។ វាពិតជាកម្លាំងមួយដ៏ខ្លាំងណាស់! ខ្ញុំក៏បានរត់ចេញពីផ្ទះ ហើយអ្នកជិតខាងខ្ញុំជាច្រើនផ្សេងទៀត ក៏បានរត់ភៀសខ្លួនផងដែរ ដើម្បីរកកន្លែងមានសុវត្ថិភាព» ។
គួរឲ្យដឹងថា មិនមានរបាយការណ៍ណាមួយ បង្ហាញអំពីការខូចខាតធំៗ ឬការបាត់បង់ជីវិតនៅឡើយនោះទេ។ ខណៈដែលការប្រកាសន្នថា អាចនឹងកើតមានរលកយក្សស៊ូណាមិ គឺនៅតែបន្តធ្វើឡើង និងបានជំរុញឲ្យប្រជាពលរដ្ឋទាំងអស់ បង្កើនការប្រុងប្រយ័ត្នផងដែរ។
គួររម្លឹកផងដែរថា ប្រទេសឥណ្ឌូនេស៊ី ដែលស្ថិតនៅក្នុងប្រជុំកោះដ៏ធំ មានចំនួនប្រជាជនប្រមាណ ២៦០លាននាក់នេះ ជាញឹកញាប់តែងតែទទួលរងការវាយប្រហារពីគ្រោះធម្មជាតិរួមមាន រញ្ជួយដី បំផ្ទុះភ្នំភ្លើង និងរលកយក្សស៊ូណាមិជាដើម។ នេះក៏ដោយសារតែ ប្រទេសឥណ្ឌូនេស៊ី ស្ថិតនៅក្នុងខ្សែតំបន់ដែលហៅថា «Ring Of Fire» នៃមហាសមុទ្រប៉ាស៊ីហ្វិច ដែលសកម្មភាពច្រើននូវគ្រោះធម្មជាតិទាំងនេះ។
ជាក់ស្តែង កាលពីឆ្នាំមុន រញ្ជួយដីកម្រិត ៧,៥រ៉ិចទ័រ និងបង្កើតឲ្យមានរលក្សស៊ូណាមិនោះ ក៏បានវាយប្រហារទីក្រុង Palu កោះ Sulawesi រហូតសម្លាប់មនុស្សអស់ប្រមាណជាង ២,២០០នាក់ ខណៈដែលមនុស្សជាច្រើនពាន់នាក់ផ្សេងទៀតបានបាត់ខ្លួនផងដែរ៕
ទស្សនាវីដេអូខាងក្រោម៖
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]