អេស្ប៉ាញ៖ ប្រធានក្លិប Barcelona លោក Josep Maria Bartomeu នៅតែបន្តរម្លឹកពីគោលបំណងក្នុងការរក្សាទុកកីឡាករ Ousmane Dembele បន្តទៀត បើទោះបីជាមានការចាប់អារម្មណ៍ពីសំណាក់ក្លិបហង្សក្រហម Liverpool យ៉ាងណាក្តី។ គួរឱ្យដឹងថា ក្លិប Barcelona កំពុងស្ថិតក្នុងការកែទម្រង់ និងរុះរើក្លិបដើម្បីត្រៀមនារដូវក្តៅនេះ ប៉ុន្តែយ៉ាងណាមិញ ក្លិបក៏ត្រូវការលក់កីឡាករខ្លះចេញដើម្បីត្រៀមលុយចំណាយនាំចូលកីឡាករថ្មី ខណៈដែល Dembele ក៏ត្រូវបានគេដឹងថាជាបេក្ខភាពដែលនឹងអាចលក់ចេញផងដែរ។
ប៉ុន្តែយ៉ាងណាមិញ បើតាមប្រភពពីកាសែត Marca របស់អេស្ប៉ាញបានឱ្យដឹងថា លោក Bartomeu បានជួបជាមួយ Dembele ព្រមទាំងតំណាងរបស់កីឡាកររូបនេះរួចជាស្រេច ដើម្បីបញ្ជាក់ថា Dembele គឺច្បាស់ថាពិតជាត្រូវរក្សាទុកដោយ Barcelona បន្តទៀតសម្រាប់រដូវកាលក្រោយ។
ការរក្សាទុក Dembele នេះមានន័យថា ក្លិប Barcelona នឹងរៀបចំក្រុមថ្មីនារដូវកាលក្រោយ ដែលពោរពេញដោយកីឡាករវ័យក្មេងនិងមានទេពកោសល្យខ្ពស់ដូចជាកីឡាករចំណូលថ្មី Frenkie De Jong ព្រមទាំងកីឡាករដែលជាគោលដៅធំបំផុត Matthijs De Ligt ជាដើម។ ជារួមមក លោក Bartomeu ក៏បានបញ្ជាក់ថា ក្លិប FC Barcelona គ្មានបំណង ឬគម្រោងណាមួយដើម្បីលក់ Dembele ចេញឡើយ ប៉ុន្តែប្រហែលជានឹងអាចមានការពិចារណាបាន ប្រសិនបើមាន “សំណើសំខាន់បំផុត” ណាមួយត្រូវដាក់ជូនមកកាន់ក្លិប៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]