រាជធានីភ្នំពេញ ៖ បុរសជារត់រ៉ឺម៉កម៉ូតូម្នាក់ត្រូវជនមិនស្គាល់មុខវាយសម្លាប់ ហើយ ត្រូវបានគេប្រទះឃើញសពដេកស្លាប់ក្នុងថ្លុកឈាមយ៉ាងអាណោចអាធ័ម។ ឃាតកម្ម នេះបង្កឲ្យមានការភ្ញាក់ផ្អើលកាលពីវេលាម៉ោងប្រមាណ៣ និង៤០នាទីរសៀល ថ្ងៃទី១២ ខែមិថុនា ឆ្នាំ២០១៩ នៅតាមផ្លូវលំមុខផ្ទះរបស់ខ្លួនក្នុងភូមិអណ្តូង សង្កាត់គោករកា ខណ្ឌព្រែកព្នៅ។
ជនរងគ្រោះដែលត្រូវឃាតកវាយសម្លាប់ឈ្មោះ កែម គីរីវុធ ហៅពៅ អាយុ៥០ឆ្នាំ មុខរបររត់រ៉ឺម៉កម៉ូតូ ស្នាក់នៅភូមិកើតហេតុខាងលើត្រូវបានឃាតកមិនស្គាល់មុខ វាយនឹងរបស់រឹង ហើយដេកស្លាប់នៅក្បែរផ្ទះ របស់ខ្លួន។ ទោះបីជាយ៉ាងណាគេពុំដឹងថា បុរសរូបនោះត្រូវបានគេវាយសម្លាប់តាំងពីពេលណា ហើយមានគំនុំអ្វីឡើយ។
តាមប្រភពព័ត៌មានឲ្យដឹងថា នៅមុនពេលកើតហេតុ មានមេជាងសំណង់ម្នាក់ ឈ្មោះ ប៉េង វុធធិន អាយុ៣៧ឆ្នាំ ដែលជាអ្នកធ្វើផ្ទះឲ្យជនរងគ្រោះក៏បានធ្វើដំណើរចេញមកយកខ្សាច់ ក៏បានប្រទះឃើញបុរសជាម្ចាស់ផ្ទះដេកស្លាប់នៅក្នុងថ្លុកឈាម ហើយបង្កការភ្ញាក់ផ្អើលដល់ប្រជាពលរដ្ឋ និងរាយការណ៍ប្រាប់សមត្ថកិច្ចចុះពិនិត្យតែម្តង។
តាមព័ត៌មានឲ្យដឹងទៀតថា ជាទូទៅជនរងគ្រោះ តែងទុករ៉ឺម៉កម៉ូតូនៅលើផ្លូវបេតុង រួចក៏បានដើរចូលផ្ទះតែពេលនេះមិនដឹងមូលហេតុអ្វីនោះទេ ស្រាប់តែ គេប្រទះឃើញដេកស្លាប់។
គេពុំដឹងថា ឃាតកមានគំនុំអ្វីនោះទេ បានជាវាយសម្លាប់បុរសនោះទាំងថ្ងៃ ហើយ ពុំមាននគរបាលដឹងបែបនោះ។ បន្ទាប់ពីមានការភ្ញាក់ផ្អើលនគរបាលជំនាញក៏បានចុះទៅកន្លែង កើតហេតុ ធ្វើការត្រួតពិនិត្យសព មានស្នាមផុងលលាដ៍ពីក្រោយ។ នគរបាលជំនាញក៏បានសន្និដ្ឋានថា ជនរងគ្រោះត្រូវបានឃាតក វាយកសម្លាប់នឹងរបស់រឹង។
តាមសមត្ថកិច្ចមានការសង្ស័យថា ឃាតក មិននៅឆ្ងាយនោះទេអាចលួចវាយទៅលើជនរងគ្រោះចំក្បាលបណ្តាលឲ្យដួលស្លាប់នោះកន្លែង សមត្ថកិច្ចកំពុងតែស្រាវជ្រាវ ជុំវិញឃាតកម្មនោះ។ តាមព័ត៌មានចុងក្រោយបានឲ្យដឹងថា ឃាតក ជាមនុស្សញៀនថ្នាំ ត្រូវបានកម្លាំងនគរបាលឃាត់ខ្លួនបានហើយនៅវេលាយប់៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
