រាជធានីភ្នំពេញ ៖ បុរសម្នាក់ត្រូវបានស្ត្រីជាប្រពន្ធដាក់ពាក្យប្ដឹងសុំការអន្តរាគមន៍ពីសំណាក់កម្លាំងនគរបាលប៉ុស្តិ៍ កន្ទោកឲ្យចាប់ខ្លួនទាំងយប់ ដោយបានចោទប្រកាន់ថាបុរសជាប្ដីម្នាក់នេះមិនដឹងជាយ៉ាងម៉េចទេឲ្យតែ បានស្រា ចូលខ្លួនហើយគឺមានចិត្តកាចសាហាវតែងតែប្រើអំពើហិង្សាវាយដំច្រំធាក់ធ្វើបាបរូបនាងជាញឹកញាប់ ព្រមទាំងវាយ បំផ្លិចបំផ្លាញទ្រព្យសម្បត្តិនៅក្នុងផ្ទះថែមទៀតផង។
ដោយសារតែប្ដីមានចរិតខិលខូចកាចសាហាវ ពូកែវាយដំ បែបនេះហើយ ទើបធ្វើឲ្យនាងអត់ទ្រាំតទៅទៀតលែងបានព្រោះនាងពុំមែនជាបាវសាក់សម្រាប់ឲ្យប្ដីវាយ រាល់ថ្ងៃ ឡើយ ក៏សម្រេចដាក់ពាក្យប្តឹងសុំឲ្យនគរបាលឃាត់ខ្លួនចាត់ការតាមច្បាប់តែម្ដង។
ការចាប់ខ្លួននេះបានធ្វើឡើង កាលពីវេលាម៉ោង១០ និង៣០នាទីយប់ ថ្ងៃទី១០ ខែមិថុនា ឆ្នាំ២០១៩ ស្ថិតនៅក្នុងភូមិកន្ទោកជើង សង្កាត់កន្ទោក ខណ្ឌកំបូល រាជធានីភ្នំពេញ។
បុរសរូបនេះឈ្មោះ លឹម ញ៉ាញ់ អាយុ៣៩ឆ្នាំ មុខរបរបើកបររថយន្ត មានទីលំនៅក្នុង ភូមិកើតហេតុខាងលើ ចំណែកស្ត្រីជាប្រពន្ធមិនត្រូវបានទម្លាយឲ្យដឹងឈ្មោះឡើយ គ្រាន់តែដឹងថាអ្នកទាំង២ នាក់នេះ រៀបការជាប្ដីប្រពន្ធនឹងគ្នា១០ឆ្នាំមកហើយ និងមានកូន២នាក់នៅក្នុងបន្ទុកគ្រួសារថែមទៀតផង។
តាមនគរបាលបានឲ្យដឹងថា មុននឹងឈានដល់ការឃាត់ខ្លួន បុរសនេះកម្លាំងនគរបាលប៉ុស្តិ៍កន្ទោក បានទទួលពាក្យបណ្ដឹងរបស់ស្ត្រីជាប្រពន្ធដែលបានប្ដឹងចោទប្រកាន់ថាបុរសនេះបានប្រើអំពើហិង្សាក្នុងគ្រួសារ ដោយនៅពេលផឹកស្រវឹងម្ដងៗតែងបានវាយធ្វើបាបនាងជាបន្តបន្ទាប់។
ព្រមទាំងវាយបំផ្លិចបំផ្លាញទ្រព្យសម្បត្តិ នៅក្នុងផ្ទះមានដូចជា តុ ទូ ទូរទស្សន៍ជាដើម បណ្ដាលឲ្យរងការខូចខាតខ្ទេចខ្ទី រហូតអត់ទ្រាំទៅនឹងសកម្មភាព ប្រើហិង្សាលែងបានតទៅទៀតនោះ ទើបនាងសម្រេចចិត្តដាក់ពាក្យប្ដឹងសុំឲ្យកម្លាំងនគរបាលប៉ុស្តិ៍ ជួយអន្តរាគមន៍ ចាប់ខ្លួនលោកប្ដីតែម្ដង។
ក្រោយពេលចាប់ខ្លួនជនសង្ស័យជាប្ដីរូបនេះបាននិយាយទាំងដៃទាំង២ជាប់ខ្នោះថា ខ្លួនមិនបានវាយដំនាងជាប្រពន្ធនោះឡើយ ប៉ុន្តែបានវាយទ្រព្យសម្បត្តិនៅក្នុងផ្ទះ ហើយក៏ត្រូវបានប្រពន្ធប្ដឹង ឲ្យនគរបាលចាប់ខ្លួនបែបនេះ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
