មកស្គាល់តារាតៃវ៉ាន់វ័យ ៥១ឆ្នាំ មានមុខមាត់ រាងរៅស្រស់ស្អាត មិនចាញ់ក្រមុំៗមួយចំនួនប៉ុន្មានទេ

តៃវ៉ាន់៖ តារាតៃវ៉ាន់អ្នកនាង Stephanie Hsiao Chiang បានធ្វើឱ្យអ្នកលេងអ៊ីនធើណេតមានការភ្ញាក់ផ្អើលនិងចាប់អារម្មណ៍ជាខ្លាំង បន្ទាប់ពីរូបថតរបស់នាងត្រូវបានចែកចាយពាសពេញបណ្តាញសង្គមកាលពីពេលថ្មីៗនេះរួចមក។

យោងតាមប្រភពបានឱ្យដឹងថា រូបថតរបស់តារាជើងចាស់ សាច់ចាំ រាងខ្ញង់រូបនេះត្រូវបានចែកចាយពេញអ៊ីនធើណេត បន្ទាប់ពីហ្វេនម្នាក់បានថតរូបនាងនៅក្នុងព្រលានយន្តហោះ រួចក៏បង្ហោះចូលក្នុងបណ្តាញសង្គម។

យោងតាមរូបភាពនេះបានបង្ហាញថា បើទោះបីជាអ្នកនាង Stephanie Hsiao Chiang ស្លៀកសំពត់ខ្លីពណ៌ស្វាយមិនសូវសាកសមនឹងអាយុរបស់គាត់ក្តី ក៏អ្នកប្រើប្រាស់អ៊ីនធើណេតជាច្រើនមានការភ្ញាក់ផ្អើល ព្រោះតែរូបរាងរបស់គាត់ពិតជាស្រស់ស្អាតខ្លាំងមែនទែន។

ក្នុងនោះអ្នកប្រើប្រាស់បណ្តាញសង្គម Weibo ម្នាក់បានបញ្ចេញមតិថា៖

«គាត់អាយុ ៥១ឆ្នាំ តែមើលទៅដូច ២១ឆ្នាំ។ តែយើងអាយុ ២០ឆ្នាំ តែរូបរាងយើងមើលទៅដូច ៤០ឆ្នាំទៅវិញ។»

អស់រយៈពេលជាច្រើនឆ្នាំមកហើយដែលអ្នកនាង Stephanie Hsiao Chiang រមែងរក្សាទម្ងន់ត្រឹមតែ ៤៥គីឡូក្រាមនិងទំហំចង្កេះតិចជាង២៤សង់ទីម៉ែត្រ។ លើសពីនេះទៅទៀត អ្នកនាងក៏ធ្លាប់ជាប់ឈ្មោះជាស្រីស្អាតដាច់គេប្រចាំកោះតៃវ៉ាន់ផងដែរ។

រូបថតរបស់នាងដែលត្រូវបានហ្វេនថតជាប់នោះគឺមិនមានការកែច្នៃ ឬPhotoshop អ្វីនោះទេ ដែលធ្វើឱ្យមនុស្សម្នាជាច្រើនមានការកោតសរសើរនូវសម្រស់របស់អ្នកនាងជាខ្លាំង។ 

យ៉ាងណាមិញ អ្នកនាង Stephanie Hsiao Chiang ក៏បានបង្ហើបឱ្យដឹងថា មូលហេតុដែលនាងនៅតែក្មេងស្រស់ស្អាតអីចឹង មកពីនាងឧស្សាហ៍ហាត់យូហ្គា, ហែលទឹក, និងលេងកីឡាជិះសេះជាញឹកញាប់។

បន្ថែមពីនេះទៀត អ្នកនាងក៏បាននិយាយទៀតថា៖

«ខ្ញុំគិតថា សម្រស់គឺជាផ្នែកមួយនៃអាជីពរបស់ខ្ញុំ ហើយគ្មានអ្វីដែលត្រូវអួតនោះទេ»៕ 

• តារាចិន