អត្ថបទនេះ ជាចម្លើយសម្រាប់សំណួរ ស្រីៗគ្នាយើងជាច្រើន តែងចង់ដឹង និងសួរពេទ្យគ្រប់ពេល។ អំឡុងពេលពពោះ ប្រើថ្នាំពេទ្យ ថ្នាំបុរាណ ប៉ះពាល់ដល់ម៉ាក់ៗ និងគភ៌អត់? ព្រោះអំឡុងពេលពពោះរឿងផឹកថ្នាំ គឺចៀសមិនផុតទេ ដោយសារតែបញ្ហាសុខភាពមួយចំនួន និងបម្រែបម្រួលអ័រម៉ូន ក៏ដូចជាការប្រែប្រួលក្នុងរាងកាយជាដើម។ “Hello គ្រូពេទ្យ” នឹងស្រាយចម្ងល់គ្នាយើង ពីថ្នាំណាមានសុវត្ថិភាពអំឡុងពេលពពោះ និងថ្នាំគ្មានសុវត្ថិភាព ដើម្បីការពារពីគ្រោះថ្នាក់ពេលមានផ្ទៃពោះ ដូចជា រលូត កូនស្លាប់ក្នុងផ្ទៃ ឬកើតមកស្លាប់ (Stillbirth) និងផលប៉ះពាល់លើកូនពីកំណើតជាដើម។
១- មានថ្នាំពេទ្យមានសុវត្ថិភាពទាំងស្រុងចំពោះស្រីៗពពោះដែរទេ?
ជាការពិត គ្មានថ្នាំពេទ្យណាមានសុវត្ថិភាព ១០០% ចំពោះស្រីៗមានផ្ទៃពោះនោះទេ ទោះជាថ្នាំមានវេជ្ជបញ្ជា មិនត្រូវការវេជ្ជបញ្ជា ថ្នាំបំប៉ន ឬថ្នាំបុរាណក៏ដោយ។ ជារឿងចាំបាច់សម្រាប់គ្នាយើងមានផ្ទៃពោះ ត្រូវតែពិគ្រោះជាមួយគ្រូពេទ្យ បើចង់ប្រើថ្នាំពេទ្យប្រភេទថ្មីណាមួយ ឬផ្លាស់ប្ដូរថ្នាំយើងកំពុងប្រើ។ គ្នាយើងត្រូវតែប្រើថ្នាំតាមកម្រិតណែនាំពីគ្រូពេទ្យ ដើម្បីចៀសវាងពីការភ្លេចប្រើថ្នាំ ឬប្រើថ្នាំលើសកម្រិត។
២- ថ្នាំទូទៅមានសុវត្ថិភាពចំពោះស្ត្រីមានផ្ទៃពោះ
ថ្នាំទូទៅមានសុវត្ថិភាពចំពោះស្រីៗកំពុងពពោះ គឺសំដៅលើថ្នាំមានកម្រិតគ្រោះថ្នាក់ទាបបំផុត ហើយត្រូវបើប្រើតាមកម្រិតណែនាំ និងស្ថានភាពសុខភាពដែលត្រូវការ ខណៈថ្នាំទាំងនោះរួមមាន៖
– ថ្នាំប៉ារ៉ាសេតាមុល (Acetaminophen) ប្រើដើម្បីព្យាបាលគ្រុនក្ដៅ ផ្ដាសាយ ឈឺចាប់ ឈឺក្បាល។ មិនត្រូវប្រើថ្នាំនេះ ច្រើនជាង ៣ ថ្ងៃជាប់គ្នា ដើម្បីបន្ថយបញ្ហាគ្រុនក្ដៅ និងច្រើនជាង ១០ ថ្ងៃជាប់គ្នា ដើម្បីបន្ថយការឈឺចាប់នោះទេ។
– ថ្នាំប្រឆាំងអាស៊ីដក្រពះ (Antacids) និងថ្នាំ Simethicone ប្រើដើម្បីព្យាបាលបញ្ហាក្រហាយទ្រូងដោយសាអាស៊ីដក្រពះ (Heartburn) និងបញ្ហាក្រពះ ដូចជា ឈឺពោះ និងភើជូរ។
– ថ្នាំ Psyllium ថ្នាំ Polycarbophil (Equalactin, Mitrolan) ជាពពួកថ្នាំជាតិសរសៃបន្ទន់លាមក។
– ថ្នាំ Dextromethorphan ព្យាបាលក្អក ។
– ថ្នាំ Guaifenesin ប្រើដើម្បីកាត់ស្លេស្ម (Expectorant- ថ្នាំជួយធ្វើឲ្យបញ្ចេញស្លេស្មពីប្រព័ន្ធដង្ហើម)។ ទោះជាយ៉ាងនេះក្ដី គ្រូពេទ្យច្រើនណែនាំឲ្យស្ត្រីមានផ្ទៃពោះចៀសវាងប្រើថ្នាំនេះនៅត្រីមាសទី ៣ នៃការពពោះ។
– ថ្នាំក្រែមលាបឫសដូងបាត (Hemorrhoid creams )។
– ថ្នាំងងុយគេង (Sleep aids ) ត្រូវបានណែនាំឲ្យប្រើក្នុងរយៈពេលខ្លីប៉ុណ្ណោះ។
– ថ្នាំបំប៉ន (Nutrient supplements) មានអាស៊ីដហ្វូលីក ស្រីៗពពោះ ត្រូវបានណែនាំញ៉ាំឲ្យបានច្រើន ដើម្បីការពារផលប៉ះពាល់ចំពោះគភ៌ ដូចជាអវយវៈមិនគ្រប់លក្ខណៈពីកំណើត (Birth defects) ប៉ុន្តែម៉ាក់ៗគួរចៀសវាង ញ៉ាំវីតាមីន A ច្រើនហួសហេតុ ព្រោះអាចធ្វើឲ្យពុលគភ៌បាន។
៣- ថ្នាំពេទ្យមានគ្រោះថ្នាក់ចំពោះស្រីៗពពោះ
ថ្នាំពេទ្យមួយចំនួនមានគ្រោះថ្នាក់ គួរតែចៀសវាងប្រើអំឡុងពេលមានផ្ទៃពោះ ដោយសារតែមានភស្ដុតាងជាក់លាក់ ពីគ្រោះថ្នាក់កើតឡើងចំពោះស្រីៗប្រើថ្នាំទាំងនេះ ដូចជា៖
– ថ្នាំ Aspirin ថ្នាំ Ibuprofen និង ថ្នាំ Naproxen ប្រើដើម្បីព្យាបាលគ្រុនក្ដៅ ផ្ដាសាយ ឈឺក្បាល និងគ្រុន។ ប្រើថ្នាំ Acetaminophen (Tylenol) អាចមានប្រសិទ្ធិភាពជំនួសថ្នាំទាំងនេះបាន។
– ថ្នាំ Isotretinoin សម្រាប់ព្យាបាលមុន។
– ថ្នាំ Thalidomide ប្រើដើម្បីព្យាបាលជំងឺមហារីក Multiple Myloma (ជំងឺមហារីកម្យ៉ាងកើតឡើងចំពោះកោសិកាឈាមសមួយប្រភេទហៅថា Plasma B Cell) និងជំងឺស្បែក មួយចំនួន។
– ពពួកថ្នាំ Angiotensin-converting enzyme (ACE) inhibitors ប្រើដើម្បីព្យាបាលបញ្ហាខ្សោយបេះដូងពីកំណើត និងជំងឺលើសឈាម។ ថ្នាំទាំងនេះ អាចប្រើនៅត្រីមាសទី ១ ប៉ុណ្ណោះ និងមិនត្រូវប្រើនៅត្រីមាសទី ២ និងទី ៣ នោះទេ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
