វគ្គផ្តាច់ព្រ័ត្រពានរង្វាន់សម្តេច ហ៊ុន សែន (ថ្នាក់ខេត្ត)! សៀមរាប ប៉ះត្បូងឃ្មុំនៅកីឡដ្ឋាន វិសាខា

ភ្នំពេញ៖ ទីបំផុតការប្រកួតពានរង្វាន់សម្តេចហ៊ុន សែន (ថ្នាក់ខេត្ត) បានរកឃើញក្រុមជម្រើសខេត្តចំនួន ២ ដែលត្រូវជួបប្រកួតគ្នាដណ្តើមជើងឯក ក៏ដូចជាត្រៀមលក្ខណៈចូលរួមការប្រកួតពានរង្វាន់សម្តេច ហ៊ុន សែន (ថ្នាក់ជាតិ)ផងដែរ។ បេក្ខភាពខេត្តដែលត្រៀមប្រកួតដណ្តើមជើងឯកថ្នាក់ខេត្តនោះគឺ ក្រុមបាល់ទាត់ជម្រើសខេត្តសៀមរាប និងក្រុមបាល់ទាត់ជម្រើសខេត្តត្បូងឃ្មុំ។

គួរបញ្ជាក់ថា ក្រុមបាល់ទាត់ជម្រើសខេត្តសៀមរាប បានឡើងមកកាន់វគ្គផ្តាច់ព្រ័ត្រនេះ ក្រោយពីបានទម្លាក់ក្រុមបាល់ទាត់ជម្រើសខេត្តកោះកុង ខណៈដែលក្រុមបាល់ទាត់ជម្រើសខេត្តត្បូងឃ្មុំ បានទម្លាក់ក្រុមជម្រើសខេត្តរតនគិរី នៅវគ្គពាក់កណ្តាលផ្តាច់ព្រ័ត្រ។ យ៉ាងណាមិញ នៅថ្ងៃជាមួយគ្នានោះ ក្រុមជម្រើសខេត្តកោះកុង និងក្រុមជម្រើសខេត្តរតនគិរី ក៏នៅមានភារកិច្ចប្រកួតដណ្តើមចំណាត់ថ្នាក់លេខ៣ ក៏ដូចជាកៅអីមួយដើម្បីឡើងមកកាន់ការប្រកួតពានរង្វាន់សម្តេច ហ៊ុន សែន (ថ្នាក់ជាតិ) ផងដែរ។

សូមជម្រាបថា ការប្រកួតវគ្គផ្តាច់ព្រ័ត្រពានរង្វាន់សម្តេច ហ៊ុន សែន (ថ្នាក់ខេត្ត) ឆ្នាំនេះ នឹងត្រូវរៀបចំឡើងនាថ្ងៃពុធ ទី២៩ ខែឧសភាខាងមុខនេះ នៅទឹកដីកីឡដ្ឋានវិសាខា ដែលស្ថិតនៅហ្គ្រេនភ្នំពេញ។ ការប្រកួតដណ្តើមចំណាត់ថ្នាក់លេខ៣ រវាងខេត្តកោះកុង និងខេត្តរតនគិរី នៅវេលាម៉ោង ៣:០០នាទីរសៀល និងការប្រកួតដណ្តើមជើងឯករវាង ខេត្តសៀមរាប ទល់នឹងខេត្តត្បូងឃ្មុំ ធ្វើឡើងនៅវេលាម៉ោង ៦:០០នាទីល្ងាច៕