អីយ៉ា! គ្រូបង្វឹក Barcelona បញ្ជាក់ថា ក្លិបពិតជាបានទាក់ទងចង់បាន Griezmann ពិតមែន

អេស្ប៉ាញ៖ លោក Ernesto Valverde បានទម្លាយថា ក្លិប Barcelona ពិតជាបានទាក់ទងទៅកាន់ Antoine Griezmann ពិតប្រាកដមែន សម្រាប់ការផ្ទេរមកកាន់ក្លិបនារដូវក្តៅនេះ។ ខ្សែប្រយុទ្ធសញ្ជាតិបារាំងរូបនេះ ទើបតែបានប្រកាសចាកចេញពីក្លិប Atletico Madrid ជាផ្លូវការ ដែលជំរុញឱ្យ Barcelona បង្ហាញចំណាប់អារម្មណ៍ភ្លាមៗតែម្តងក្រោយការប្រកាសនេះ។

លោក Valverde បាននិយាយថា៖ “ពិតណាស់ ពួកយើងបានធ្វើការទាក់ទងទៅកាន់គេ (Griezmann) រួចជាស្រេចហើយ។ ដោយឡែក ចំពោះកិច្ចចរចាកំពុងតែដំណើរការ ប៉ុន្តែយ៉ាងណាមិញ ពួកយើងមិនទាន់បញ្ចប់រដូវកាលនេះជាផ្លូវការនៅឡើយទេ”។ គួរបញ្ជាក់ថា លោក Valverde នៅមានភារកិច្ចមួយបន្ថែមទៀតនារដូវកាល គឺការដឹកនាំក្រុម Barcelona ប្រកួតវគ្គផ្តាច់ព្រ័ត្រទល់នឹង Valancia នាថ្ងៃទី២៦ ខែឧសភាខាងមុខនេះ ។

គួររម្លឹកបន្ថែមទៀតថា កិច្ចសន្យាទិញផ្តាច់របស់កីឡាករ Antoine Griezmann នឹងត្រូវបើកឱ្យចរចាចាប់ពីថ្ងៃទី ១ ខែកក្កដានេះតទៅ។ ក្លិប Barcelona ហាក់ជាក្លិបដែលមានប្រៀបជាងគេក្នុងការនាំយកកីឡាកររូបនេះ ស្របពេលដែលក្លិប Paris Saint-Germain និង Manchester City បានដកខ្លួនលែងចង់បានរូបគេ។ ចំពោះតម្លៃទិញផ្តាច់កិច្ចសន្យារបស់កីឡាកររូបនេះវិញ គឺមានតម្លៃ ១០៥លានអឺរ៉ូ៕