Bale ក្តែងៗថាមិនព្រមចេញទៅណា! ថែមទាំងនិយាយបែបហីល្មម Real Madrid ចុកឈាម!

អេស្ប៉ាញ៖ កីឡាករ Gareth Bale ត្រូវបានគេរាយការណ៍ថា រូបគេបាននិយាយទៅកាន់មិត្តរួមក្រុមនៅ Real Madrid ថា “គេសុខចិត្តនៅបន្តជាមួយ Real Madrid និងទៅលេងវាយកូនហ្គោលក៏បាន ប្រសិនបើក្លិបមិនព្រមចំណាយលុយ ៥១លានអឺរ៉ូក្នុងការផ្តាច់កុងត្រាដែលនៅសល់រយៈពេល ៣ឆ្នាំនេះ”។ Bale ត្រូវបានលោក Zidane ដាក់ឱ្យអង្គុយនៅកៅអីបម្រុងពេញ ៩០នាទីតែម្តង ក្នុងការប្រកួតចុងក្រោយប្រចាំរដូវកាល ២០១៨/២០១៩ ទល់នឹងក្រុម Real Betis។ លើសពីនេះទៅទៀត ក្រោយពីបញ្ចប់ការប្រកួតភ្លាម Bale បានដើរចេញពីកៅអីបម្រុងចូលទៅបន្ទប់ផ្លាស់សម្លៀកបំពាក់ភ្លាមតែម្តង ដោយមិនបានលាទៅកាន់អ្នកគាំទ្រឡើយ។

ដោយឡែក បើតាមប្រភពពី Radioestadio បានឱ្យដឹងថា Bale បានបង្ហើរសម្តីមួយជាមួយមិត្តរួមក្រុម ទៅកាន់ក្លិប Real Madrid ទៀតផង។ កីឡាករសញ្ជាតិវែលស៍រូបនេះបានពោលថា៖ “ខ្ញុំនៅសល់កិច្ចសន្យារយៈពេល ៣ឆ្នាំទៀតជាមួយ Real Madrid។ បើសិនជាពួកគេ (ក្លិប) ពិតជាចង់ឱ្យខ្ញុំចាកចេញទៅពិតមែន ពួកគេត្រូវតែបង់ឱ្យខ្ញុំ ១៧លានអឺរ៉ូក្នុងមួយរដូវកាល។ ប៉ុន្តែបើគេមិនព្រមបង់ទេ ខ្ញុំនឹងនៅទីនេះបន្ត និងទៅលេងវាយហ្គោលក៏បាន”៕