កន្លងមកយើងធ្លាប់ដឹងថា ទឹកផ្លែឈើជាជម្រើសល្អមួយ ល្អជាងភេសជ្ជៈប៉ូវកម្លាំង ភេសជ្ជៈផ្អែមៗជាច្រើនទៀត តែយ៉ាងណាមិញ ការស្រាវជ្រាវថ្មីទើបបង្ហាញថា ការញ៉ាំទឹកផ្លែឈើច្រើន ក៏នឹងជួបហានិភ័យដល់អាយុជីវិតដែរ បើញ៉ាំច្រើនហួសប្រមាណ។
ក្រុមការងារសាកលវិទ្យាល័យ Emory សហការជាមួយ សាកលវិទ្យាល័យ Cornellនៅសហរដ្ឋអាមេរិកបានសិក្សាលម្អិតលើកដំបូងដោយប្រៀបធៀបគុណវិបត្តិនៃ ទឹកផ្លែឈើ និងភេសជ្ជៈផ្អែមៗ (ទឹកក្រូច ទឹកតែក្រូចឆ្មារ…) ដែលមានទំនាក់ទំនងហានិភ័យដល់សុខភាព។ ការស្រាវជ្រាវបានរកឃើញគួរឲ្យភ្ញាក់ផ្អើលថា ការញ៉ាំទឹកផ្លែឈើសុទ្ធចំណុះត្រឹមតែ ៣៤០មិល្លីលីត្រក្នុងមួយថ្ងៃ អាចបង្កឲ្យមានអត្រាឆាប់ស្លាប់ប្រមាណ ២៤% ជាមួយគ្នានេះ ក្នុងចំណុះ៣៤០ មិល្លីលីត្រដូចគ្នា នៃភេសជ្ជៈជាតិស្ករផ្អែមៗ អាចបង្កហានិភ័យអត្រាឆាប់ស្លាប់មុនអាយុ ៦%។
លទ្ធលនៃការសិក្សាខាងលើ បានផ្អែកទៅលើទិន្នន័យដែលបានប្រមូលមកជាង៦ឆ្នាំ ដោយការតាមដានទៅលើ ទម្លាប់ញ៉ាំភេសជ្ជៈរបស់យុវជនស្ម័គ្រចិត្តប្រមាណ ១៣ ០០០នាក់ ហើយការតាមដានធ្វើឡើងដោយតាមរយៈការបំពេញក្រដាសសំណួរជាប្រចាំរបស់ក្រុមអ្នកស្រាវជ្រាវ។
អ្នកជំនាញពីក្រុមការងារស្រាវជ្រាវបានឲ្យដឹងថា ជាធម្មតា ប្រភេទភេស្ជៈផ្លែឈើដែលមានជាតិស្ករ Fructose (ជាតិស្ករមានក្នុងផ្លែឈើ ទឹកឃ្មុំ) ក៏អាចបង្កភាពស៊ាំអាំងស៊ុយលីនដំណើរការខុសប្រក្រតី ក៏ដូចជាជម្រុញឲ្យ អ័រម៉ូនឲ្យបង្កើនភាពធាត់ជុំវិញរាងកាយ។ ដូច្នេះ ទាំងភេសជ្ជៈជាតិផ្អែម ក៏ដូចជាទឹកផ្លែឈើដែរ អាចបង្កើនហានិភ័យជំងឹបេះដូង និងទឹកនោមផ្អែមដូចគ្នា។
ពាក់ព័ន្ធនឹងបញ្ហាខាងលើនេះ ក្រុមអ្នកជំនាញសុខភាពមកពីមូលនិធិសុខភាពជាតិនៃចក្រភពអង់គ្លេស បានណែនាំជម្រើសសម្រាប់អ្នកចូលចិត្តផ្លែឈើ ដោយការបរិភោគផ្ទាល់ ជំនួសឲ្យការញ៉ាំភេសជ្ជៈទឹកផ្លែឈើក្រឡុក ឬទឹកផ្លែឈើស្រស់ក្នុងបរិមាណច្រើនក្នុងមួយថ្ងៃ។ អ្នកជំនាញក៏បានណែនាំផងដែរ ឲ្យកម្រិតការញ៉ាំទឹកផ្លែឈើស្រស់ដើម្បីសុខភាព គឺត្រឹមតែ ១៥០មិល្លីលីត្រ ប៉ុណ្ណោះក្នុង១ថ្ងៃ។
លោកវេជ្ជបណ្ឌិត Gunter Kuhnle អ្នកជំនាញសុខភាព និងជាសាស្រ្តាចារ្យសាកលវិទ្យាល័យ Reading ចក្រសភពអង់គ្លេសបាននិយាយថា៖
«ការសិក្សានេះ ពិតជាមានសារៈសំខាន់មែនទែន ទោះបីទឹកផ្លែឈើ ត្រូវគេមើលឃើញថាល្អសម្រាប់សុខភាពជាងភេសជ្ជៈជាតិស្ករ តែវាក៏ផ្តល់សារធាតុស្ករច្រើនពេកផងដែរ។ នៅអង់គ្លេសពេលនេះ គេណែនាំឲ្យញ៉ាំត្រឹមតែ ១៥០មិល្លី ក្នុង១ ថ្ងៃ តែជម្រើសកាន់តែល្អទៀតនោះគឺញ៉ាំផ្លែឈើផ្ទាល់តែម្តង»៕
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្តល់សិទ្ធិដោយ Hello Krupet
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
