ច្បាស់ណាស់អ្នក​ណា​មិន​ធ្លាប់​ឈឺ​ស្មា សុខៗ​ក្រោក​ពី​គេង​ស្រាប់​តែ​ជាប់​ស្មាលើក​ដៃ​សឹង​មិន​រួច ប៉ុន្តែ​គ្នា​យើង​ខ្លះ​មាន​បញ្ហា​ឈឺ​សន្លាក់​ស្មា​រ៉ាំ​រ៉ៃ​ក៏​មាន។ ឈឺ​ស្មាមិន​ត្រឹម​តែ​រំខាន​ខ្លាំង​ទេ ថែម​ទាំង​ប៉ះ​ពាល់​ការ​ងារ​ប្រចាំ​ថ្ងៃ​ទៀត​ផង បើ​អ៊ី​ចឹងចង់​ដឹង​ពី​មូល​ហេតុ និង​វិធី​ដោះ​ស្រាយ ដោយ​គ្រាន់​តែ​សាក​វិធី​​ហាត់​ប្រាណ​ពិសេស ៥ យ៉ាង​នេះអាច​ជួយ​បាន។

១- មូល​ហេតុ​បង្ក​ឲ្យ​ជាប់​សន្លាក់​ស្មា

បញ្ហា​ជាប់​សន្លាក់​ស្មា (Frozen shoulder Syndrome) ជា​បញ្ហា​សុខភាព​ម្យ៉ាង ដោយ​សារ​មាន​ការ​រលាក​នៅ​លើ​សន្លាក់​ឆ្អឹង​ស្មារួម​មាន បញ្ហា​សរសៃ​តង់​ដុង សរសៃ​ពួរ (Ligaments) សាច់​ដុំ ឆ្អឹង​មូល និង​ប្រហោង​ឆ្អឹង​សន្លាក់ (Socket joint)។ ដោយ​សារ​សរីរាង្គ​ទាំង​នេះមាន​ការ​រលាក ទើប​ធ្វើ​ឲ្យ​យើង​ឈឺ​ចាប់​ពេល​ធ្វើ​ចលនា បើ​សិន​ជា​គ្មាន​ការ​ព្យាបាល​ត្រឹម​ត្រូវស្ថានភាព​ជំងឺ​នឹង​កាន់​តែ​ធ្ងន់​ទៅៗ។

នៅ​មិន​ទាន់​ដឹង​ច្បាស់​ពី​មូល​ហេតុ​នាំ​ឲ្យ​ជាប់​សន្លាក់​ស្មា​នៅ​ឡើយ​ទេ ប៉ុន្តែ​មាន​កត្តា​ប្រឈម​ខ្លះ​នាំ​ឲ្យ​មាន​បញ្ហា​នេះដូច​ជា៖

– កត្តា​អាយុ៖ ម៉ាក់​ប៉ា អ៊ំៗ មាន​អាយុ​ចន្លោះ​ពី ៤០-៦០ ឆ្នាំ ជួប​ប្រទះ​ជំងឺ​ឈឺ​ស្មា​នេះ​ញឹកញាប់​បំផុត។
– កត្តា​ភេទ៖ ៧០% ក្នុង​ចំណោម​ករណី​ជាប់​សន្លាក់​ស្មា​ទាំង​អស់​ ត្រូវ​គេ​ដឹង​ថា កើត​លើ​ស្រីៗ។
– កត្តា​វេជ្ជសាស្ត្រ៖ ជំងឺ​មួយ​ចំនួន ធ្វើ​ឲ្យ​ប៉ះ​ពាល់​ដល់​មេតាបូលីសដូច​ជា ជំងឺ​ទឹក​នោម​ផ្អែម កើន​ឡើង​ឬ ថយ​ចុះ​អ័រម៉ូន​ក្រពេញ​ទីរ៉ូអ៊ីត បញ្ហា​គ្រប់​គ្រង​ប្រព័ន្ធ​ចរន្ត​ឈាម​ខ្សោយ និង​ជំងឺ​របេង។
អាការៈ​បែប​នេះ​ធ្វើ​ឲ្យ​ជីវិត​យើង​ជួប​ការ​លំបាក​ច្រើន យ៉ាង​ណា ដើម្បី​ព្យាបាល ឬ​​បង្ការ​កុំ​ឲ្យ​មាន​បញ្ហា​សន្លាក់ គ្នា​យើង​គ្រាន់​តែ​ហាត់​ប្រាណ​តាម​វិធី​សាមញ្ញៗ​មួយ​ចំនួន​នៅ​តាម​ផ្ទះ​ក៏​អាច​ជួយ​បាន​ដូច​គ្នា។

២- លំហាត់​ប្រាណ​ល្អ​បំផុត​បើ​មាន​សន្លាក់​ស្មា

– ហាត់​ប្រាណ​លាត​សន្ធឹង និង​បង្វិល​ស្មា (Pendulum Stretch)៖ វិធី​ហាត់​ប្រាណ​មួយ​នេះ គ្នា​យើង​ត្រូវ​ឈរ​ហើយ​ផ្អែក​ទ្រេត​បន្តិច ទល់​ជាមួយ​កៅអី ឬ​តុ ដើម្បី​ទប់​លំនឹង ដោយ​ទុក​ដៃ​ឈឺ​ព្យួរ​ចុះ​ក្រោម រួច​យោល​ដៃ​ឈឺ​ចុះ​ឡើងៗ​តាម​ចលនា​រាង​រង្វង់។ អនុវត្ត​ឲ្យ​បាន ១០​ជុំ ប៉ុន្តែ​ហាត់​តែ​ម្ដង​ប៉ុណ្ណោះ​ក្នុង​មួយថ្ងៃ។ នៅ​ពេល​អាការៈ​ជំងឺ​កាន់តែ​ប្រសើរ យើង​អាច​បន្ថែម​ទម្ងន់​ក្នុង​ដៃ​ដើម្បី​ពង្រឹង​សន្លាក់​ស្មា។
– ហាត់ប្រាណ​តាម​ចលនា Double shoulder Circles៖ វិធី​នេះងាយ​ធ្វើ​បំផុត ដោយ​គ្រាន់តែ​ដាក់​ដៃ​ទាំងពីរ​នៅ​លើ​ស្មា រួច​ធ្វើ​ចលនា​បង្វិល​ស្មា​ជា​រាង​រង្វង់។ អាច​ស្រមៃ​ថា យក​កែងដៃ​​យើង​មក​គូស​ជា​រង្វង់ ធ្វើ​ចលនា​ដដែលៗ​ឲ្យ​បាន ២០ ដង​ជា​រាង​រង្វង់​ស្រប​តាម​ទិស​ទ្រនិច​នាឡិកា រួច​ធ្វើ ២០ ដង​ទៀត​បញ្ច្រាស​ទិស​ទ្រនិច​នាឡិកា​វិញ​ម្ដង។
– ហាត់​តាម​បែប Towel stretch៖ លំហាត់​ប្រាណ​បែប​នេះត្រូវ​ប្រើ​ដៃ​ឈឺនៅ​ទី​តាំង​ខាង​លើកាន់​ក្រមា ឬ​កន្សែង​ពោះ​គោ​មួយបោះ​ទៅ​ក្រោយ​ខ្នង ដោយ​ដៃ​ម្ខាង​ទៀត​ចាំ​ចាប់​ពី​ក្រោម ហើយ​ទាញ​ចុះ​ទាញ​ឡើង​ដុស​សម្អាត​ខ្នង។ គួរ​ធ្វើ​បែប​នេះ​ឲ្យ​បាន​ពី ១០-២០ ដង/​ថ្ងៃ។
– ហាត់​ប្រាណ​របៀប Wall Slides៖ ឈរ​ទល់​មុខ​ជញ្ជាំង លា​សន្ធឹង​ដៃ និង​ដាក់​បាត​ដៃ​លើ​ជញ្ជាំង បន្ទាប់​មក​រុញ​ដៃ​យឺតៗ​ទៅ​លើ រួច​ចុះ​មក​ក្រោម​វិញ។ ត្រូវ​ចាំ​ថា ធ្វើ​ចលនា​យឺត​បំផុត ដើម្បី​កុំ​ឲ្យ​ឈឺ​ចាប់ និង​ធ្វើ​ដដែលៗ​ឲ្យ​បាន ១៥ ដង រៀង​រាល់ថ្ងៃ។
– លំហាត់ Cross Body Stretch៖ ហាត់​ប្រាណ​បែប​នេះ ត្រូវ​ប្រើ​ដៃ​មិន​ឈឺ លើក​កែង​ដៃ​ឈឺ រួច​ទាញ​ថ្នមៗ​មក​រក​ដើម​ទ្រូង។ លា​ដៃ​ឲ្យ​ត្រង់​រយៈពេល ១៥-២០ វិនាទី បន្ត​ធ្វើ​បែប​នេះ​អោយ​បាន ១០-២០ ដង/​ថ្ងៃ។

ក្នុង​ករណី​មាន​សំណួរ ឬ​មន្ទិលសង្ស័យ​ជុំវិញ​សុខភាព​អ្នក ជម្រើស​ល្អ​បំផុត សូម​ពិគ្រោះ និង​ប្រឹក្សា​យោបល់​ផ្ទាល់​ជាមួយ​ពេទ្យ​ជំនាញ។ Hello Health Group មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕

អត្ថបទផ្ដល់សិទ្ធិដោយ Hello Krupet

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 085836679 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 085836679 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក សម្រស់ & សុខភាព និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]