អ្នកណាមិនប្រាថ្នាស្បែកមុខស្រស់ស្អាត ទោះបីមានចង្ការព្រែក ចង្ការវី មុខពងក្រពើ ពីកំណើតក៏ពិតមែន ប៉ុន្តែបើលើមុខសុទ្ធតែស្នាមខូងដោយសារមុន ច្បាស់ជាបាត់បង់សម្រស់មួយភាគធំមិនខាន។ ពិតណាស់ មុនគឺជាការវិវត្តបែបធម្មតាជាតិចំពោះរាងកាយមនុស្ស ប៉ុន្តែបើមិនថែរក្សាឬព្យាបាល ច្បាស់ជាវីវរហើយ។ យ៉ាងណាគ្នាយើងមានស្នាមខូងដោយសារមុន កុំទាន់បារម្ភ “Hello គ្រូពេទ្យ” នឹងប្រាប់វិធីព្យាបាលមុខខូងឲ្យគ្នាយើងបានដឹង។
១- មូលហេតុបង្កឲ្យមានមុន
មនុស្សសឹងគ្រប់គ្នាសុទ្ធតែធ្លាប់កើតមុន យ៉ាងហោចណាស់ម្តងនៅក្នុងមួយជីវិត ព្រោះវាជាការវិវត្តបែបធម្មជាតិលើរាងកាយមនុស្ស។ ប៉ុន្តែកត្តាផ្សេងៗរួមចំណែកឲ្យកើតមុនរួមមាន ការបញ្ចេញក្រពេញខ្លាញ់កើនឡើង ការកកើតកោសិកាខ្លាញ់ ជំងឺដុំពកស្បែកដោយសារចាល់ផ្តុំជាតិការ៉េទែននៅក្នុងរន្ធរោម ដែលកត្តានេះជម្រុញឲ្យមានការរលាក និងការបញ្ចេញអ័រម៉ូនមិនប្រក្រតី។ ជំងឺមុនច្បាស់ជាបន្សល់ទុកនូវស្លាកស្នាម និងសម្លាកមុនតាមធម្មតាជាកាកសរសៃខូឡាជែន ដែលលេចឡើងនៅខាងក្នុងស្រទាប់ស្បែក។
២- ទម្រង់សម្លាកបង្កដោយសារមុន
ទម្រង់សម្លាកមុនរួមមាន ផ្ទាំងស្បែកពពាល ការប្រែសម្បុរស្បែកខុសធម្មតា សម្លាករបស់ជាលិកា និងការបាត់បង់ជាលិកា។ ផ្ទាំងស្បែកពពាលមានលក្ខណៈសំប៉ែត ដោយមានចំណុចពណ៌ក្រហមបញ្ជាក់ថា កន្លែងនោះធ្លាប់មានមុនកើតម្តងហើយ។ ប្រែប្រួលសម្បុរស្បែកខុសធម្មតា កើតមានឡើងនៅពេលស្នាមអុចលើស្បែកមានពណ៌ ប្រែប្រួលរាងខុសប្លែក ហើយមុនដែលជាសះស្បើយហៅថា ការប្រែពណ៌ដោយសាររលាក។ សម្លាកជាលិកាសភាពហាក់ដូចជាជាលិការីកធំ ត្រូវគេហៅថាផ្លែសាច់ ឬសម្លាកដោយសារជាលិការីកមាឌប៉ោងធំខុសធម្មតា ដោយសារលើសជាតិខូឡាជែននៅក្នុងស្បែកយើង។ ម៉្យាងវិញទៀតបាត់បង់ជាលិកាជាបញ្ហាឃើញមានញឹកញាប់ជាងសម្លាកជាលិកា ដោយសម្លាកទាំងនោះមានសភាពខូង មានរន្ធប្រហោងតូចៗនៅលើផ្ទៃស្បែក។ នៅមានឈ្មោះសម្លាកផ្សេងទៀតដូចជា មុខខ្មូតស៊ី សម្លាកផុងដោយសារជាលិកាសរសៃកកើតឡើងវិញច្រើន សម្លាកទន់ ការរួញស្វិតផ្ទាំងនៃរន្ធរោម និងផ្ទាំងស្បែកដែលស្វិតរួញ។
៣- វិធីព្យាបាលសម្លាកមុន
ពិគ្រោះជាមួយវេជ្ជបណ្ឌិតឯកទេសផ្នែកសើស្បែក ដើម្បីទទួលបានការព្យាបាលសមរម្យ និងសក្តិសម ដើម្បីសម្អាតយកចេញនូវសម្លាកមុនជ្រៅឲ្យអស់ពីមុខយើង។ វិធីព្យាបាលមានច្រើនប្រភេទដូចជា៖
– ខាត់ស្នាមខូងឲ្យស្មើ៖ វិធីនេះ ត្រូវចាត់ទុកមានប្រសិទ្ធភាព ដើម្បីសម្អាតយកចេញសម្លាក ដោយប្រើប្រាស់ម៉ូទ័រខាត់ ឬឧបករណ៍ដទៃទៀតទៅបន្ថយជម្រៅសម្លាកលើមុខ។ វិធីនេះ ប្រើពេលប៉ុន្មានថ្ងៃ ដើម្បីឲ្យជាសះស្បើយ។ ស្បែកយើងនឹងឡើងពណ៌ក្រហម ហើម ក្រោយព្យាបាល។ ខុសពីការខាត់កោសសម្អាតស្បែកដោយម៉ូទ័រខាត់ ខាត់កោសសម្អាតស្បែកកម្រិតស្រាល ជាវិធីព្យាបាលមួយផ្សេងទៀត។ ដើម្បីសម្អាតយកចេញផ្ទៃស្បែកសម្លាកចេញ អ្នកឯកទេសរោគសើស្បែក និងបាញ់ជាតិគ្រីស្តាល់តូចៗជាច្រើន ដើម្បីជំនួសឲ្យជក់ខាត់របស់ម៉ូទ័រ និងត្រូវការព្យាបាលលើសពីមួយដងដើម្បីសម្អាតយកសម្លាកចេញ។
– បកស្បែកដោយប្រើសារធាតុគីមី៖ បកស្បែកដោយប្រើជាតិថ្នាំគីមី ដើម្បីលុបបំបាត់ចោលសម្លាកមុនរាក់ៗ និងពណ៌ស្បែកដែលឡើងក្រមៅខ្លាំងខុសធម្មតា ក្រោយមានការរលាក។ វិធីនេះត្រូវធ្វើឡើងដោយគ្រូពេទ្យទូទៅមានវេជ្ជបណ្ឌិត គិលានុប្បដ្ឋាយិកា ឬអ្នកឯកទេសថែរក្សាសម្រស់។ វិធីព្យាបាលរួមមាន ការប្រើប្រាស់សារជាតិអាស៊ីដមួយចំនួន ដើម្បីបកយកស្រទាប់ក្រៅស្បែក ដោយអាចប្រើពេលប៉ុន្មានថ្ងៃ។ ការស្រាវជ្រាវបង្ហាញថា បកស្បែកជម្រៅមធ្យមដោយជាតិគីមីអាចជួយជម្រះសម្លាកមុនចន្លោះពី ៥១-៧៥ ភាគរយ។ សម្រាប់សម្លាកជាលិកាខ្លះ វិធីនេះក៏មិនអាចសម្អាតយកចេញបានដែរ។ ករណីដូចជា សម្លាកផ្លែសាច់នឹងត្រូវព្យាបាលដោយការលាបក្រែមមានជាតិអាស៊ីដរេទីណូអ៊ិច ដើម្បីកាត់បន្ថយដុំសាច់ពកដែលចុះចេញ។
– ចាក់ថ្នាំបំពេញសម្លាក៖ ប្រើប្រាស់ថ្នាំចាក់បំពេញឲ្យប៉ោងក៏ជាវិធីព្យាបាលឧស្សាហ៍ឃើញប្រើជាញឹកញាប់ដូចគ្នា។ សារធាតុខូឡាជែន អាស៊ីដ ហាយ៉ាលូរ៉ូនិក ឬខ្លាញ់ ត្រូវបានប្រើប្រាស់ដើម្បីបំពេញស្នាមសម្លាក ជាពិសេសសម្រាប់សម្លាកទាំងឡាយ ដែលមានស្បែកមានសភាពស្រុតខូង។ ចាក់ថ្នាំបំពេញបំប៉ោងត្រូវធ្វើឡើងម្តងហើយម្តងទៀត ដោយប្រើពេលប៉ុន្មានខែ អាស្រ័យទៅលើប្រភេទផលិតផល។
– ព្យាបាលដោយវះកាត់៖ វិធីនេះប្រើសម្រាប់គ្នាយើងសម្លាកមុនខូងសាច់ ហើយការវះកាត់ស្បែកនឹងត្រូវបានធ្វើឡើងដោយកាត់ចោលសម្លាក បន្ទាប់មកដេរ ឬការផ្សាំជួសស្បែក។ សម្លាកថ្នេរដេរត្រូវបានសម្អាតយកចេញយ៉ាងងាយ ដោយប្រើពន្លឺកាំរស្មី ដើម្បីសម្អាតរៀបចំស្រទាប់ផ្ទៃស្បែកឡើងវិញ ឬដោយការខាត់បកស្បែកកម្រិតស្រាល។
– ព្យាបាលដោយបាញ់កាំរស្មី៖ ជាវិធីព្យាបាលល្អបំផុត ប្រើប្រាស់កាំរស្មីសម្អាតយកចេញនូវស្រទាប់ក្រៅស្បែក តំបន់សម្លាកមុន និងកាត់បន្ថយភាពក្រហមរបស់ស្នាមមុន ដែលជាសះស្បើយ។ ការព្យាបាលដោយកាំរស្មី គឺប្រើប្រាស់ពន្លឺមានពណ៌តែមួយ និងមានកម្តៅដើម្បីដាស់ភ្ញោចកោសិកាសាច់ដែលមានផ្លែស្តារជាតិអេឡាស្ទីន និងខូឡាជែនរបស់ស្បែកត្រលប់ឲ្យដូចដើមវិញ។ ព្យាបាលវិធីនេះដើម្បីសម្អាតចោលស្បែកខូចខាត ធ្វើឲ្យស្បែកថ្មីកកើតឡើងវិញ។ ព្យាបាលដោយកាំរស្មី ត្រូវធ្វើជាច្រើនលើកដើម្បីឲ្យស្បែកសះស្បើយ។ ណាត់ជួបពិគ្រោះគ្រូពេទ្យ ឬអ្នកជំនាញសើស្បែក ដើម្បីទទួលបានការព្យាបាលត្រឹមត្រូវ និងពាក់ព័ន្ធសម្រាប់ស្បែកមុខ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
