ថ្មីៗនេះ ក្រសួងសុខាភិបាលបានប្រកាសអំពាវនាវដល់ឪពុកម្ដាយដែលមានកូនស្រីអាយុចាប់៩ឆ្នាំដល់១៤ឆ្នាំ ឆាប់នាំកូនទៅចាក់ថ្នាំ ដើម្បីបង្ការជំងឺមហារីកមាត់ស្បូន។

ជំងឺមហារីកមាត់ស្បូន បង្កឡើងដោយវីរុស HPV ដែលឆ្លងតាមការរួមភេទ។ សូមនាំកុមារីអាយុពី៩ឆ្នាំ ទៅ១៤ឆ្នាំ ដែលមិនទាន់បានទទួលថ្នាំបង្ការជំងឺមហារីកមាត់ស្បូនពីមុន ត្រូវមកទទួលនៅតាមសាលារៀន តាមភូមិ និងតាមមណ្ឌលសុខភាព ដោយឥតគិតថ្លៃ។

ថ្នាំបង្ការមហារីកមាត់ស្បូន មានសុវត្ថិភាព គុណភាព និងប្រសិទ្ធភាព ដោយមានការអនុញ្ញាតពីក្រសួងសុខាភិបាល និងទទួលស្គាល់ដោយអង្គការសុខភាពពិភពលោក។

យុទ្ធនាការថ្នាក់ជាតិក្នុងឆ្នាំ២០២៦ នេះ នឹងត្រូវអនុវត្តចែកចេញជា ២ដំណាក់កាលគឺ៖

​-ដំណាក់កាលទី១ អនុវត្តចាប់ពីថ្ងៃទី១០ ដល់ថ្ងៃទី២០ ខែវិច្ឆិកា ឆ្នាំ២០២៦ នៅក្នុងរាជធានី-ខេត្តចំនួន ១២ (រួមមាន រាជធានីភ្នំពេញ ពោធិ៍សាត់ កំពង់ឆ្នាំង សៀមរាប កំពង់ធំ ឧត្តរមានជ័យ ព្រះវិហារ ស្ទឹងត្រែង មណ្ឌលគិរី ព្រះសីហនុ កោះកុង និងប៉ៃលិន) 

-ដំណាក់កាលទី២ អនុវត្តចាប់ពីថ្ងៃទី១ ដល់ថ្ងៃទី១៨ ខែធ្នូ ឆ្នាំ២០២៦ នៅក្នុងខេត្តចំនួន ១៣ ទៀត (រួមមាន បន្ទាយមានជ័យ បាត់ដំបង កំពង់ចាម កណ្តាល តាកែវ កំពង់ស្ពឺ កំពត កែប ព្រៃវែង ស្វាយរៀង រតនគិរី ក្រចេះ និងត្បូងឃ្មុំ)។