ត្បូងឃ្មុំ៖ ក្រោមទស្សនវិស័យ «ភាពជោគជ័យនៃអាជីវកម្ម ត្រូវតែផ្សារភ្ជាប់ជាមួយតម្លៃដែលតបស្នងត្រឡប់ទៅសង្គម» ក្រុមហ៊ុនផលិតផលទឹកដោះគោ អង្គរ ( AngkorMilk ) បានប្រារព្ធខួប ១០ឆ្នាំ នៃប្រតិបត្តិការរបស់ខ្លួននៅព្រះរាជាណាចក្រកម្ពុជា តាមរយៈការកសាង និងប្រគល់អគារសិក្សាថ្មីស្រឡាងមួយខ្នង ជូនដល់សាលាបឋមសិក្សាគ្រញូង ក្រោមអធិបតីភាពដ៏ខ្ពង់ខ្ពស់របស់ ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន ព្រមទាំងមានការចូលរួមពីអាជ្ញាធរដែនដី មាតាបិតា លោកគ្រូ អ្នកគ្រូ និងសិស្សានុសិស្សយ៉ាងច្រើនកុះករ។

ពិធីប្រគល់អគារសិក្សានេះ គឺជាសារតបស្នងយ៉ាងមានអត្ថន័យចំពោះការគាំទ្ររបស់ប្រជាពលរដ្ឋកម្ពុជាក្នុងរយៈពេលមួយទសវត្សរ៍កន្លងមក ដែលបានជ្រើសរើស AngkorMilk ជាផលិតផលទឹកដោះគោប្រចាំគ្រួសារ។ ក្រុមហ៊ុនបានគូសបញ្ជាក់ថា គ្មានកាដូអនុស្សាវរីយ៍គម្រប់ខួបណាមានតម្លៃជាងការបន្សល់ទុកនូវមូលដ្ឋានគ្រឹះអប់រំ និងទីកន្លែងបណ្តុះក្តីសុបិនដល់កុមារជំនាន់ក្រោយនោះឡើយ។

ថ្លែងក្នុងពិធីសម្ពោធនោះ ថ្នាក់ដឹកនាំក្រុមហ៊ុន AngkorMilk បានលើកឡើងថា៖

«កាលពី ១០ឆ្នាំមុន យើងបានចាប់ផ្តើមជាមួយបេសកកម្មដ៏សាមញ្ញ គឺផ្តល់ផលិតផលទឹកដោះគោដែលមានសុវត្ថិភាព គុណភាព និងអាហារូបត្ថម្ភល្អបំផុតដល់ប្រជាជនកម្ពុជា។ មកទល់ពេលនេះ កម្ពុជាមិនត្រឹមតែជាទីផ្សារប៉ុណ្ណោះទេ ប៉ុន្តែគឺជាផ្ទះរបស់យើង ហើយប្រជាជនកម្ពុជាគឺជាក្រុមគ្រួសាររបស់យើង។ អគារសិក្សាថ្មីនេះ គឺជាសក្ខីភាពបញ្ជាក់ថា AngkorMilk តែងតែនៅក្បែរអ្នក និងប្តេជ្ញារួមដំណើរជាមួយអ្នកជានិច្ច»។

ដំណើរលើមាគ៌ា ១០ឆ្នាំ៖ ពីរោងចក្រដំបូង ឆ្ពោះទៅជាសសរស្តម្ភសេដ្ឋកិច្ចជាតិ

Angkormilk គឺជារោងចក្រកែច្នៃផលិតផលទឹកដោះគោមុនគេបង្អស់នៅកម្ពុជា ដែលបោះទីតាំងនៅក្នុងតំបន់សេដ្ឋកិច្ចពិសេសរ៉ូយ៉ាល់ភ្នំពេញ (RPPSEZ)។ ដោយប្រើប្រាស់បច្ចេកវិទ្យាស្វ័យប្រវត្តិកម្រិតខ្ពស់ពីស៊ុយអែត អាល្លឺម៉ង់ អ៊ីតាលី និងសហរដ្ឋអាមេរិក ព្រមទាំងប្រកាន់ខ្ជាប់នូវស្តង់ដារអន្តរជាតិ (ISO, FSSC 22000, HACCP, GMP) ក្រុមហ៊ុនបានក្លាយជាកម្លាំងចលករមួយនៃសេដ្ឋកិច្ចកម្ពុជា៖

• ការរួមចំណែកថវិការដ្ឋ៖ បានបំពេញកាតព្វកិច្ចបង់ពន្ធជូនរដ្ឋសរុបប្រមាណ ៨២ លានដុល្លារ             អាមេរិក។
• ការបង្កើតការងារ និងធនធានមនុស្ស៖ ផ្តល់ការងារផ្ទាល់ជូនបុគ្គលិកជាង ៦០០នាក់ និង បណ្តុះបណ្តាលវិស្វករ ក៏ដូចជាអ្នកបច្ចេកទេសខ្មែរឱ្យមានជំនាញផលិតកម្មចំណីអាហារកម្រិតពិភពលោក។
• សេដ្ឋកិច្ចសហគមន៍៖ គាំទ្របណ្តាញអាជីវកម្មដៃគូចែកចាយ និងអ្នកលក់ដុំ-រាយជាង ៥០,០០០ អាជីវករនៅទូទាំងប្រទេស ដោយបម្រើអតិថិជនជាង ៣លាននាក់ជារៀងរាល់ឆ្នាំ។

បោះជំហានចូលទសវត្សរ៍ថ្មី៖ គម្រោងបង្កើតកសិដ្ឋានចិញ្ចឹមគោយកទឹកដោះស្តង់ដារទំនើប

លើសពីសមិទ្ធផលកន្លងមក AngkorMilk បានប្រកាសជាផ្លូវការនូវទិសដៅអភិវឌ្ឍន៍ថ្មីមួយទៀត គឺការត្រៀមបោះទុនវិនិយោគបន្ថែមលើ កសិដ្ឋានចិញ្ចឹមគោយកទឹកដោះស្តង់ដារខ្ពស់ និងទំនើបនៅកម្ពុជា។ គម្រោងនេះកើតឡើងក្រោមកិច្ចចង្អុលបង្ហាញ ការលើកទឹកចិត្ត និងការគាំទ្រយ៉ាងពេញទំហឹងពីសំណាក់ ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន ក្នុងគោលបំណងពង្រឹងខ្សែច្រវ៉ាក់កសិ-ឧស្សាហកម្ម បណ្តុះបណ្តាលជំនាញកសិកម្មបែបទំនើបដល់កសិករក្នុងស្រុក កាត់បន្ថយការនាំចូលទឹកដោះគោពីបរទេស និងជំរុញឱ្យកម្ពុជាមានលទ្ធភាពកាន់តែខ្ពស់ក្នុងការផ្គត់ផ្គង់វត្ថុធាតុដើមទឹកដោះគោដោយខ្លួនឯង។

ពិធីនេះបានបិទបញ្ចប់ទៅដោយក្តីសោមនស្សរីករាយ ការចែករំលែកស្នាមញញឹមដល់កូនៗសិស្សានុសិស្ស ព្រមទាំងការប្តេជ្ញាចិត្តជាថ្មីថា AngkorMilk នឹងបន្តរីកចម្រើនទៅមុខជាមួយកម្ពុជា  ក្រោមស្មារតី «ផលិតសម្រាប់ប្រជាជនកម្ពុជា និងរីកចម្រើននៅកម្ពុជា» ជារៀងរហូត៕