នៅរសៀលថ្ងៃសៅរ៍ ទី១០ ខែតុលា ភ្ញៀវទេសចរនៅឧទ្យានសត្វព្រៃ Yorkshire (Yorkshire Wildlife Park) ក្នុងទីក្រុង Doncaster ប្រទេសអង់គ្លេស បានទៅទស្សសនាត្វខ្លា Amur របស់ឧទ្យានពីខាងលើស្ពាន។

ក្នុងចំណោមនោះមានបុរសម្នាក់ ដែលយោងតាមសម្តីភ្ញៀវម្នាក់ទៀត គឺកំពុងពាក់កាសស្តាប់តន្ត្រី និងរាំយ៉ាងរីករាយ ខណៈពេលកំពុងមើលសត្វខ្លានោះ។ គាត់ថែមទាំងបានសុំឱ្យមនុស្សម្នាក់ទៀតជួយថតរូបគាត់ ដោយមានសត្វខ្លាដ៏ធំនោះនៅពីក្រោយផងដែរ។

ស្ត្រីនោះបាននិយាយថា គាត់ហាក់ដូចជាមិនបានមកទីនោះជាមួយនរណាម្នាក់ឡើយ។ បន្ទាប់មក គាត់បានឡើងចូលទៅក្នុងបរិវេណឃុំឃាំងសត្វខ្លានោះ។

វីដេអូដែលត្រូវបានចែករំលែកនៅពេលក្រោយមកទៀត បានបង្ហាញរូបគាត់នៅខាងក្នុង ហើយសត្វខ្លាក៏បានវាយប្រហារបុរសនោះតែម្ដង។ បុគ្គលិកឧទ្យានបានអនុវត្តនីតិវិធីសង្គ្រោះបន្ទាន់ ហើយក្រុមគ្រូពេទ្យបានព្យាយាមជួយសង្គ្រោះគាត់ ប៉ុន្តែបុរសនោះត្រូវបានប្រកាសថាបានស្លាប់នៅនឹងកន្លែងកើតហេតុ។

ប៉ូលិស South Yorkshire កំពុងបន្តស៊ើបអង្កេតដើម្បីស្វែងយល់ឱ្យច្បាស់ថា តើគាត់បានចូលទៅក្នុងនោះដោយរបៀបណា។ ឈ្មោះរបស់គាត់មិនត្រូវបានបញ្ចេញជាសាធារណៈទេ ហើយក្រុមគ្រួសាររបស់គាត់កំពុងទទួលបានការគាំទ្រពីមន្ត្រីជំនាញ។

សត្វខ្លានោះមានឈ្មោះថា Altai ជាខ្លា Amur អាយុ ៥ ឆ្នាំ ដែលជាប្រភេទសត្វមានសល់តែប្រហែល ៥០០ ក្បាលប៉ុណ្ណោះនៅក្នុងធម្មជាតិ។ ពួកវាត្រូវបានគេស្គាល់ផងដែរថាជាខ្លា Siberian (Siberian tigers) ដែលជាប្រភេទសត្វខ្លាធំជាងគេបំផុតនៅលើផែនដី ហើយខ្លាឈ្មោលពេញវ័យអាចមានទម្ងន់លើសពី ៤០០ ផោន (១៨០ គីឡូក្រាម)។

វាបានមកដល់ឧទ្យាននេះក្នុងខែកុម្ភៈ ឆ្នាំ ២០២៥ បន្ទាប់ពីធ្វើដំណើរចម្ងាយជាង ១,១០០ ម៉ាយ (១,៧៧០ គីឡូម៉ែត្រ) ពីសួនសត្វមួយក្នុងប្រទេសន័រវែស ដែលជាផ្នែកមួយនៃកម្មវិធីបង្កាត់ពូជអន្តរជាតិសម្រាប់ប្រភេទសត្វជិតផុតពូជ។ ឧទ្យានបានពណ៌នាវាថាជាសត្វដែលមានចរិត "ស្ងប់ស្ងាត់ និងចូលចិត្តចង់ដឹងចង់ឃើញ"។

ឧទ្យាននេះបានបិទទ្វារសម្រាប់ថ្ងៃចុងសប្តាហ៍ដែលនៅសល់ ហើយនឹងបន្តបិទទ្វារ ខណៈពេលដែលបុគ្គលិកដែលរងផលប៉ះពាល់ផ្លូវចិត្តយ៉ាងខ្លាំងទទួលការព្យាបាលផ្លូវចិត្តពីអ្នកជំនាញ។

ទន្ទឹមនឹងនេះ ឧទ្យានបានទទួលសារជាច្រើនពីមនុស្សដែលព្រួយបារម្ភអំពីជោគវាសនារបស់ Altai។ នៅថ្ងៃអាទិត្យ ឧទ្យានបានផ្តល់ចម្លើយដល់ពួកគេថា៖ «យើងអាចធានាដល់មនុស្សគ្រប់គ្នាថា វាមានសុវត្ថិភាព និងសុខភាពល្អ ហើយនឹងមិនត្រូវបានសម្លាប់ចោល (euthanised) ដោយសារតែហេតុការណ៍នេះឡើយ»។