អស់រយៈពេលជាង ១០ ឆ្នាំមកហើយ ដែលលោក Eric Poulin ជួបប្រទះអាការៈដែលមើលទៅហាក់ដូចជាស្រវឹងស្រា ទោះបីជាគាត់មិនបានផឹកសូម្បីតែមួយដំណក់ក៏ដោយ។

បុរសមកពីខេត្ត Nova Scotia រូបនេះមានជំងឺមួយប្រភេទដែលគេហៅថា "Auto-brewery syndrome" (ជំងឺដែលរាងកាយផលិតជាតិអាល់កុលដោយខ្លួនឯង)។ ប្រព័ន្ធរំលាយអាហាររបស់គាត់ផលិតជាតិអេតាណុល (ethanol) ក្នុងអត្រាលឿនជាងសមត្ថភាពរាងកាយក្នុងការបំបែក និងបញ្ចេញវាចោល ដែលបណ្តាលឱ្យគាត់មានអាការៈស្រវឹង ទោះបីជាគាត់មិនបានទទួលទានគ្រឿងស្រវឹងក៏ដោយ។

នៅពេលនៅផ្ទះ គាត់តែងជួបប្រទះអាការៈដ៏គួរឱ្យព្រួយបារម្ភទាំងនោះ ដោយដែលគាត់មិនអាចចងចាំអ្វីបានសោះពីហេតុការណ៍ដែលបានកើតឡើង និយាយរួមគឺស្រវឹងនៅពេលរាងកាយឡើងជាតិអាល់កុលខ្លាំង។

គាត់បាននិយាយនៅក្នុងបទសម្ភាសន៍មួយថា «កូនៗបានប្រាប់ខ្ញុំពីអ្វីដែលបានកើតឡើង ដូចជាពេលដែលខ្ញុំយំ ហើយនិយាយថាខ្ញុំនឹងស្លាប់ ខ្ញុំមិនចាំរឿងទាំងនោះសោះឡើយ»។

រោគសញ្ញា Auto-brewery (រាងកាយផលិតជាតិអាល់កុលដោយខ្លួនឯង) គឺជាករណីដ៏កម្រមួយ យោងតាម ​​Cleveland Clinic មានករណីតិចជាង ១០០ ប៉ុណ្ណោះដែលត្រូវបានកត់ត្រាទុក វាក៏មិនសូវមានការសិក្សាស្រាវជ្រាវច្រើនដែរ ដែលធ្វើឱ្យពិបាកក្នុងការកំណត់អត្តសញ្ញាណ និងធ្វើរោគវិនិច្ឆ័យ។

លោកស្រីវេជ្ជបណ្ឌិត Rahel Zewude ដែលធ្លាប់ព្យាបាលអ្នកជំងឺដែលមានរោគសញ្ញានេះ (ទោះបីជាគាត់មិនបានដឹងពីករណីជាក់លាក់របស់លោក Poulin ក៏ដោយ) បានមានប្រសាសន៍ថា រោគសញ្ញានេះបណ្តាលមកពីអតុល្យភាពនៃអតិសុខុមប្រាណនៅក្នុងពោះវៀនរបស់មនុស្ស។

លោកស្រី Zewude បានពន្យល់ថា៖ «បាក់តេរី និងផ្សិតដែលអាចបង្កឱ្យមានការផ្អាប់បង្កើតជាជាតិអាល់កុល បានក្លាយជាប្រភេទមេរោគចម្បងនៅក្នុងពោះវៀនរបស់បុគ្គលនោះ ដែលនាំឱ្យមានដំណើរការផ្អាប់នៅក្នុងពោះវៀនជាបន្តបន្ទាប់ បង្កើតបានជាកម្រិតជាតិអាល់កុលខ្ពស់ និងបណ្តាលឱ្យមានរោគសញ្ញានៃការស្រវឹង»។

រោគសញ្ញារបស់លោក Poulin ដែលអាចរួមមានការនិយាយមិនច្បាស់លាស់ ការមានក្លិនដូចជាតិអាល់កុល និងការចុះខ្សោយនៃសមត្ថភាពយល់ដឹង ជារឿយៗតែងតែលេចឡើងដោយមិនអាចដឹងមុនបាន។

ក្នុងពេលជាមួយគ្នានេះ លោក Poulin រស់នៅដោយត្រូវពឹងផ្អែកលើស្ថានភាពនៃជំងឺ "Auto-brewery syndrome" (ជំងឺដែលរាងកាយផលិតជាតិអាល់កុលដោយខ្លួនឯង)។ លោកមិនអាចធ្វើការបានទេចាប់តាំងពីឆ្នាំ ២០២៣ មក ដោយសារតែស្ថានភាពសុខភាពរបស់គាត់ ហើយគាត់ក៏បាននិយាយដែរថា វាពិតជាមានការលំបាកក្នុងការបំពេញតួនាទីជាឪពុកសម្រាប់កូនទាំង ៥ នាក់របស់គាត់។

គាត់បាននិយាយថា៖ «ខ្ញុំមិនដឹងថាមានរឿងអ្វីនឹងកើតឡើងពីមួយថ្ងៃទៅមួយថ្ងៃ ឬពីមួយម៉ោងទៅមួយម៉ោងនោះទេ ដូច្នេះវាពិតជាដាក់កម្រិតយ៉ាងខ្លាំងទៅលើអ្វីដែលខ្ញុំអាចធ្វើបាន ទីកន្លែងដែលខ្ញុំអាចទៅបាន ការងារ លុយកាក់ និងអ្វីៗគ្រប់យ៉ាង»។

«ជីវិតទាំងមូលរបស់ខ្ញុំត្រូវបានផ្លាស់ប្តូរទាំងស្រុងដោយសារតែរឿងនេះ»។

ប្រភព៖ CBC News