កម្សាន្ត៖ តារាសម្ដែង និងជាតារាចម្រៀង លោក Jerry Yan សមាជិកក្រុម F4 មានអារម្មណ៍ក្ដុកក្ដួល នៅពេលដែលលោកបានទៅលេងផ្នូររបស់មិត្តជិតស្និទ្ធរបស់ខ្លួន គឺតារាសម្តែង Barbie Hsu កាលពីថ្ងៃទី ១៣ ខែសីហា កន្លងទៅនេះ។

យោងតាមប្រព័ន្ធផ្សព្វផ្សាយតៃវ៉ាន់ តារាសម្ដែង លោក Jerry Yan បានបើកឡានតែម្នាក់ឯងទៅជួប Jia Yongjie និង Wang Zhaojie ដែលជាមិត្តជិតស្និទ្ធរបស់ Barbie Hsu នៅ Jinbaoshan ។ បន្ទាប់​មក មិត្តមួយក្រុម​នេះ​ បាន​ឡើង​ភ្នំ​ទៅ​មើល​ផ្នូរ​របស់ Barbie Hsu។

Jerry Yan ឈរនៅមុខផ្នូរសព រូបលោក​បានអោនចុះ ពាក់កណ្ដាលអង្គុយ សម្លឹងមើលផ្នូរអស់រយៈពេលយ៉ាងយូរ ដូចជាកំពុងនិយាយជាមួយមិត្តជិតស្និទ្ធរបស់ខ្លួន។ បន្ទាប់មក ក៏បានក្រោកឈរ ជូតភ្នែកដោយស្ងៀមស្ងាត់ ហើយព្យាយាមស្ងប់ស្ងាត់។ ឃើញបែបនេះ Jia Yongjie ទះស្មាលោកថ្នមៗ ដើម្បីលួងតារាប្រុសរូបនេះ។

បន្ទាប់ពី ចុះពីលើភ្នំ Jerry Yan បាត់បង់ការគ្រប់គ្រងអារម្មណ៍របស់ខ្លួន ពេលកំពុងញ៉ាំអាហារនៅភោជនីយដ្ឋានបួស។ រូបលោក​បន្ទាប​ក្បាល​ចុះ ញ៉ាំ​ហើយ​យំ ទឹកមុខ​ក្រៀមក្រំ។ 

Jerry Yan និង Barbie Hsu បានក្លាយជាមិត្តជិតស្និទ្ធនឹងគ្នាពេលកំពុងថតរឿង Meteor Garden ។ ពួក​គេ​បាន​រក្សា​មិត្តភាព​ជិត​ស្និទ្ធ​ជា​ច្រើន​ឆ្នាំ​បន្ទាប់​មក។ Barbie Hsu តែងតែហៅ Jerry Yan ថា "Dao Ming Si" ខណៈដែលលោកហៅនាងថា "San Cai" ។ នៅក្នុងបទសម្ភាសន៍មួយ Jerry Yan ធ្លាប់បាននិយាយថា «Barbie Hsu គឺជាមនុស្សសំខាន់ដែលតែងតែមានវត្តមាននៅក្នុងជីវិតរបស់ខ្ញុំ» ហើយបាននិយាយថា នាងធ្លាប់នៅជជែកគ្នាជាមួយលោក ពេញមួយយប់ និយាយគ្នានិងផ្តល់ដំបូន្មានដល់លោក អំពីជីវិតនៅពេលដែលលោកមានស្ថានភាពអាក្រក់បំផុត។ តារាប្រុសរូបនេះ បង្ហាញការខូចចិត្តចំពោះការស្លាប់របស់នាង ផងដែរ៕

ប្រភព៖ Ngoisao.net

សូមទស្សនារូបភាពខាងក្រោម៖