អាជ្ញាធរខណ្ឌកំបូល បានឆ្មក់ចូលកាស៊ីណូខុសច្បាប់មួយកន្លែង ដែលម្ចាស់ជា ជនជាតិចិន បន្លំធ្វើជាហាង​លក់ទំនិញ...

Khmertimeskh៖ ប៉ូលិសបានឆ្មក់ចូលបង្រ្កាប ការលេងល្បែងស៊ីសងខុសច្បាប់របស់ជនជាតិចិន មួយកន្លែងដែលក្លែងបន្លំ ជាហាងលក់ទំនិញ​១ដុល្លារ។​ ប្រតិបត្តិការនេះធ្វើឡើងកាលពីថ្ងៃទី០៣ ខែឧសភា ឆ្នាំ២០២៥ បណ្តាលឲ្យមានការរឹបអូសឧបករណ៍ល្បែងស៊ីសងជាច្រើន ដែលធ្វើឡើងដោយមានការសហការពីម្ចាស់ដីជួល។

គណៈបញ្ជាការឯកភាពស្រុកកំបូល ដឹកនាំដោយលោក ឃឹម ស៊ុនសូដា អភិបាលស្រុកកំបូល បានចុះបង្រ្កាបទីតាំងល្បែងស៊ីសងរបស់ជនជាតិចិន ក្រោមស្លាកយីហោ «ហាង១ដុល្លារ» ស្ថិតនៅតាមបណ្តោយផ្លូវជាតិលេខ៤ ក្នុងភូមិស្ងួនពេជ្រ សង្កាត់កន្ទោក ខណ្ឌកំបូល រាជធានីភ្នំពេញ នៅវេលាម៉ោង១០ និង១០នាទីព្រឹក ថ្ងៃទី៣ ខែឧសភា ឆ្នាំ២០២៥ ម្ចាស់ទីតាំងដែលជាជនជាតិខ្មែរផងដែរ។

ភាគីជួលដីបើកហាង និងលេងល្បែងស៊ីសងខុសច្បាប់ មានឈ្មោះ DUAN CHENGYAN ភេទស្រី ជនជាតិចិន អាយុ៥៣ឆ្នាំ។ ក្រោយដឹងថា អ្នកជួលដីខ្លួនបើកល្បែងស៊ីសង ម្ចាស់ដីជួលដែលជាជនជាតិខ្មែរ បានរាយការណ៍មកសមត្ថកិច្ច និងសំណូមពរ​អោយចុះបង្ក្រាប និងរឹបអូសយកឧបករណ៍ល្បែងស៊ីសងនេះ ព្រោះគាត់ជួលហាងឱ្យអ្នកណាដែលរកស៊ីស្របច្បាប់តែប៉ុណ្ណោះ។ 

សមត្ថកិច្ចបានរឹបអូសឧបករណ៍លេងល្បែងស៊ីសងជាច្រើនរួមមាន តុបាការ៉ាចំនួន៨ ទូម៉ាស៊ីនហ្គេមបាញ់ត្រី២គ្រឿង តុរ៉ូឡែត១ សន្លឹកបៀ ទូល្បែងស៊ីសង និងកៅអី១០០ ។ វត្ថុតាងបន្ថែមដែលរឹបអូសបានរួមមាន កុំព្យូទ័រ ទូរទស្សន៍ ម៉ាស៊ីនត្រជាក់ និងសម្ភារក្នុងហាងជាច្រើនទៀត ។វត្ថុតាងដែលរឹបអូសបានត្រូវបានបញ្ជូនទៅកាន់អធិការដ្ឋាននគរបាលស្រុកកំបូល រង់ចាំការស៊ើបអង្កេតបន្តពីអាជ្ញាធររាជធានីភ្នំពេញ ។​

តាមការស្នើសុំរបស់ម្ចាស់ដីជួល គណៈបញ្ជាការឯកភាពខណ្ឌ បានសម្រេចដកហូតសម្ភារ ដូចមានរៀបរាប់ក្នុងកំណត់ហេតុខាងលើ មករក្សាទុកបណ្តោះអាសន្ននៅអធិការដ្ឋាននគរបាលស្រុកកំបូល ដើម្បីសុំការណែនាំបន្ថែមពីគណៈបញ្ជាការឯកភាពរដ្ឋបាលរាជធានីភ្នំពេញ ចាត់ការតាមនីតិវិធី។

ប្រភពពី៖ khmertimeskh