គ្រាន់តែកាយវិការ និងខ្សែភ្នែកក៏បញ្ជាក់ដែរថា Lee Jae Wook លង់ស្នេហ៍ Karina ខ្លាំងប៉ុណ្ណា

កូរ៉េខាងត្បូង៖ ដូចដែលប្រិយមិត្តបានជ្រាប ពីដំណឹងដ៏រំភើបមួយបានផ្ទុះឡើងនាថ្ងៃទី២៧ខែកុម្ភៈឆ្នាំ២០២៤ ដោយតារាចម្រៀងស្រី Karina ជាមេក្រុមចម្រៀង aespa មានទំនាក់ទំនងស្នេហាជាមួយនឹង តារាសម្ដែងប្រុស Lee Jae Wook ដោយខាងផលិតកម្មទាំងពីរគឺ SM Entertainment និង C-Jes បានបញ្ជាក់រួចរាល់ហើយ។

អ្នកទាំងពីរបានចួបគ្នាលើកដំបូងកាលពីថ្ងៃទី១៤ ខែមករា ដែល Karina និង Jae Wook បានចូលរួមកម្មវិធីដើរម៉ូតរបស់ Prada នៅឯ Milan Fashion Week ក្នុងនាមជាអ្នកតំណាង ដោយថែមទាំងបានអង្គុយជិតគ្នាទៀតផង។

ភ្លាមៗបន្ទាប់ពីព័ត៌មានថាពួកគេទាក់ទងគ្នាបានផ្ទុះឡើង អ្នកគាំទ្របានទៅរុករកគាស់កកាយវីដេអូចាស់ៗពេល Jae Wook បានចួប Karina នៅឯកម្មវិធីនេះ ដោយក្នុងរូបភាពមួយ គេបានឃើញតារាចម្រៀងស្រីរូបនេះបានផ្ញើកាបូបនឹង Jae Wook ដោយសារនាងត្រូវថតជាមួយតារាផ្សេងទៀតហើយ តារាប្រុសសម្ដែងប្រុសរូបនេះបានមើលមកនាង ដោយខ្សែភ្នែកស្រទន់ហាក់ចូលចិត្តខ្លាំង។

មិនត្រឹមប៉ុណ្ណឹង មានវីដេអូជាច្រើនត្រូវបានចែករំលែក ដោយគេឃើញថា Karina មានភាពស្និទ្ធស្នាលជាមួយនឹង Jae Wook ខ្លាំងដោយនិយាយគ្នាសើចហើយ Jae Wook ក៏នៅក្បែរនាងសឹងតែតាំងពីដើមរហូតដល់ចប់ផងដែរ៕  

ប្រភព៖ timesnownews