ភ្នំពេញ៖ ថ្មីៗនេះគឺមានរឿងរាវវិវាទមួយរវាងលោកស្រី ទ្រី​ ដាណា និងក្រសួងវប្បធម៌ និងវិចិត្រសិល្បៈ ដែលលោកស្រីមានគោលបំណងចង់គ្រងឈុតសម្លៀកបំពាក់បុរាណ នៅក្នុងព្រឹត្តិការណ៍អង្គរសង្រ្កាននេះ 
ប៉ុន្ដែក្នុងការគ្រងឈុតរបស់លោកស្រី ត្រូវបានក្រុមការងាររបស់ក្រសួងវប្បធម៌ និងវិចិត្រសិល្បៈ បានទៅត្រួតពិនិត្យ ឃើញថា ការស្លៀកពាក់  និងការតុបតែងគ្រឿងអលង្ការតាមបែបបុរាណរចនាបថអង្គរ គឺមានកំហុសឆ្គង មិនត្រឹមត្រូវ តាមរូបចម្លាក់ដើម ទើបខាងក្រសួងពាក់ព័ន្ធសំណូមពរឲ្យលោកស្រីកែប្រែចំណុច​ ដូចជាក្បាច់ ម្កុដធំខ្ពស់ពេក និងបំពាក់គ្រឿងអលង្ការស្អេកស្កះពេក រហូតបាត់រាងរៅដ៏ល្អស្អាតរបស់តួ នៅពេលក្រសួងពាក់ព័ន្ធសំនូមពរឲ្យកែតម្រូវ ក្រុមការងាខាងលោកស្រីក៏យល់ព្រមកែតម្រូវដែល តែខាងលោកស្រីបាន​ផលិតនឹងធ្វើវារួចរាល់មកហើយ ប៉ុន្ដែពេលដែលប្រាប់ឲ្យកែតម្រូវ ខាងក្រសួងគឺនៅមិនទាន់បានទទួលរូបថ្មីដែលបានកែរួចនោះមកទេ។

លើសពីនេះ លោកស្រី​ ទ្រី ដាណា ក៏បានឆ្លើយតបភ្លាមៗមកថា ក្រសួងមិនផ្ដល់ភាពងាយស្រួលបន្ដិចក្នុងការបង្ហាញ អំពីវប្បធម៌ ហេតុអីត្រូវឲ្យរត់ទៅឌីហ្សាញម្ដងទៀត និងត្រូវទៅប្រជុំម្ដងទៀត គ្រាន់តែថតរូបភាពតែ២ឈុតសោះ ​​​​​​​ហើយមួយទៀត សម្រាប់ការដែលឲ្យកែតម្រូវក៏ក្រុមការងាររបស់លោកស្រី ក៏កែហើយដែល តែមិនទាន់អនុញ្ញាតិឲ្យចេញថតសោះ​​ និងត្រូវលើកថ្ងៃថត ហើយនាងក៏ជួលគេមកតុបតែងឲ្យលោកស្រីដែល ហើយសំលៀកបំពាក់ដែលជួលគេមកពាក់ឲ្យនោះ ក៏ធ្លាប់បានឃើញគេពាក់ថតបង្ហាញដែរ តែសម្លៀកបំពាក់នោះលោកស្រីក៏មិនទាន់បានពាក់នៅឡើយទេ។ ធ្វើឲ្យលោកស្រីមានអារម្មណ៍ថា ជាកូនខ្មែរមួយរូបដែលចង់បង្ហាញពីវប្បធម៌របស់ខ្លួនទៅកាន់ពិភពលោក មានអារម្មណ៍ថាអីក៏ពិបានម្ល៉េះ។

ដោយឡែក កាលពីព្រឹកមិញនេះ​ ក្រោមអនុសាសន៍ដ៏ខ្ពង់ខ្ពស់របស់ សម្ដេចតេជោ ហ៊ុនសែន លោកបានមានប្រសាសន៍ជាសារសម្លេង ផ្ញើរជូនលោកស្រី ទ្រី ដាណា ថាការស្រឡាញ់នឹងចង់បង្ហាញនូវ វប្បធម៌គឺពិតជាល្អប្រសើរខ្លាំងណាស់ដើម្បីឲ្យប្រជាជនខ្មែរ និងកូនចៅជំនាន់ក្រោយបានដឹងបានស្គាល់ថានេះគឺជាទម្រង់សម្លៀកបំពាក់គ្រឿងអលង្ការរបស់រូបចម្លាក់ដែលបានតាំងបង្ហាញ តែអ្វីដែលជាកង្វល់នោះគឺការតុបតែងខុសក្បួនខ្នាតនៃទម្រង់ដើម ដែលអាចអ្នកជិតខាងរបស់យើងចោទប្រកាន់ថា យើងលួចចម្លងពីរបស់គេ ហើយនឹងអាចប្រឈមមុខក្នុងការត្រូវមហាជនរិះគន់។

ដូច្នេះ សម្ដេចតេជោ ហ៊ុនសែន សូមឲ្យលោកស្រី ទ្រី ដាណា ចូលរួមសហការនឹងស្ដាប់តាមការណែនាំរបស់ក្រួសួងវប្បធម៌ និងវិចិត្រសិល្បៈ ហើយបើលោកស្រីមានបំណងចង់រៀបចំបង្ហាញនូវវប្បធម៌នោះ គឺសូមឲ្យក្រសួងពាក់ព័ន្ធបញ្ជូនអ្នកជំនាញ​រៀបចំជូនលោកស្រីភ្លាម៕

គួរបញ្ជាក់ផងដែលថា សម្ដេចតេជោ ហ៊ុនសែន​ បានបន្ថែមទៀតថា «យើងមិនអាចខ្ជីខ្ជាបាននោះទេ ចាំបាច់ដាច់ខាតត្រូវតែធ្វើឲ្យបានត្រឹមត្រូវតាមក្បួនខ្នាតដែលបានតាំងបង្ហាញ ព្រោះនៅពេលដែលការមិនអើពើ​ ចេះតែបណ្ដែតបណ្ដោយតាំងខុសពីរូបភាពដើម នោះជាហេតុដែលអាចនាំឲ្យប៉ះពាល់ប្រទេស ព្រោះក្រសួងវប្បធម៌គឺជាសេនាធិការដើម្បីការពារវប្បធម៌ ដូនតារបស់យើង មិនមែនជាក្រសួងមានការតឹងតែងទេ​​​​ ហើយការដែលចង់គ្រងនូវឈុតបុរាណតាមសម័យកាលខុសពីរូបភាពដើមនោះ ក្រសួងនឹងទទួលខុសត្រូវចំពោះមុខរាជរដ្ឋាភិបាលផង និងទទួលខុសត្រូវចំពោះរដ្ឋសភាផង សូមកុំភ្លេចថាច្បាប់របស់យើងរដ្ឋមន្រ្ដីត្រូវទទួលខុសត្រូវមុខនាយករដ្ឋមន្ដ្រី និងចំពោះមុខសភាជាតិផងដែរ។

សូមទស្សនារូបភាពខាងក្រោម៖