ច្បាស់ហើយ! កីឡាករឆ្នើមរូបនេះ គ្មានគម្រោងចាកចេញពី PSG ទៅអេស្ប៉ាញទេ

បរទេស៖ កីឡាករ Lionel Messi ត្រូវបានគេរាយការណ៍ថា នឹងមិនចាកចេញពី Paris Saint Germain ទៅកាន់លីគអេស្ប៉ាញវិញ តាមពាក្យចរចាមអារ៉ាម ដែលគេចុះផ្សាយទេ។

ជាការពិតណាស់ កាលពីថ្មីៗនេះ មានសារព័ត៌មានមួយចំនួនបានចុះផ្សាយថា Messi ត្រូវបានក្រុមគ្រួសារបង្ខំឲ្យផ្លាស់ទៅ Barcelona វិញ ព្រោះតែក្រុមគ្រួសាររបស់គេរួមមាន ភរិយា និង កូនៗ ពិបាកសម្របខ្លួននៅរដ្ឋធានី Paris នេះ ហើយថែមទាំងកូនៗទាមទារចង់ជួបមិត្តពួកគេ នៅអេស្ប៉ាញវិញទៀតផង។

បើយោងទៅតាមសារកាសែត The Sun បានចុះផ្សាយថា Messi នឹងមិនត្រលប់ទ្រនំចាស់ Barca របស់គេវិញទេ ដោយគេនឹងបន្តនៅលេងជាមួយ PSG ជាមួយនឹងកុងត្រារយៈពេល២ឆ្នាំរបស់គេ ដែលនឹងត្រូវផុតកំណត់នៅរដូវកាល ២០២៣-២៤ ខាងមុខនេះ។ លើសពីនេះទៅទៀត Messi ត្រូវបានគេរំពឹងថា អាចនឹងត្រលប់មកលើទីលានវិញ នៅក្នុងខែនេះ បន្ទាប់ពីជាសះស្បើយពីមេរោគកូវីដ-១៩រួច៕

ប្រភព៖ sportsmole