ម៉ាស៊ីនលក់ល្អិតដែលបរិភោគបាន ដាក់ដំណើរការក្នុងប្រទេសជប៉ុនយ៉ាងពេញនិយម

ជប៉ុន៖ នៅតាមបណ្ដាប្រទេសជាច្រើន តែងតែមាននូវម៉ាស៊ីនលក់ទំនិញលក់ដោយស្វ័យប្រវត្តិដូចជាស្ករគ្រាប់ ភេសជ្ជៈ និងអាហារសម្រន់ផ្សេងៗ ដែលផ្ដល់ភាពងាយស្រួលយ៉ាងខ្លាំងដល់អ្នកទិញ ដោយគ្រាន់តែដាក់កាក់ ឬក្រដាសប្រាក់ចូលម៉ាស៊ីន និងចុចជ្រើសរើសទំនិញដែលយើងត្រូវការ នោះវានឹងធ្លាក់មកតាមប្រឡោះមួយភ្លាមៗ។ ទន្ទឺមនឹងនេះដែរ ប្រទេសជប៉ុនកំពុងណែនាំនូវម៉ាស៊ីនលក់សត្វល្អិត ដែលអាចបរិភោគ នារយៈប៉ុន្មានឆ្នាំចុងក្រោយនេះ ដែលទទួលបានការពេញនិយមយ៉ាងខ្លាំង ហើយកាលពីថ្មីៗនេះ ទើបតែតំឡើងម៉ាស៊ីននៅទីក្រុងមីយ៉ាគី ភាគខាងលិចប្រទេសជប៉ុនផងដែរ។

ម៉ាស៊ីនលក់សត្វល្អិត នឹងផ្ដល់ជូននូវបញ្ជីឈ្មោះសត្វល្អិតចំនួន១២ប្រភេទដូចជា ដង្កូវឬស្សី ចង្រិត និងសត្វល្អិតក្នុងទឹកជាដើម ហើយពួកវាត្រូវបានសម្អាត ចម្អិនលាយគ្រឿង និងវេចខ្ចប់ដាក់ក្នុងកំប៉ុងរៀងខ្លួនៗ ដែលមួយកំប៉ុងលក់ក្នុងតម្លៃប្រមាណ៧០០យេន (ប្រមាណ៦ដុល្លារអាមេរិក) ដល់១,០០០យេន (ប្រមាណ៩ដុល្លារអាមេរិក)។ ចំពោះចង្រិតអំបិលវិញជាអាហារដែលពេញនិយមបំផុត ក្នុងមួយកំប៉ុងមានតម្លៃចំនួន១,៣០០យេន (ប្រមាណជិត១២ដុល្លារអាមេរិក)។ ហើយក្នុងកំប៉ុងនីមួយៗអាចមានសត្វល្អិតប្រហែលចាប់ពី២០ ទៅ៣០ក្បាលឯណោះ។

យ៉ាងណាមិញ ក៏មានប្រជាពលរដ្ឋមួយចំនួនដែរ ដែលពួកគេមានអារម្មណ៍ស្អប់ខ្ពើមសត្វល្អិត និងមិនហ៊ានទិញបរិភោគឡើយ តែសម្រាប់លោក Koga Takahiko វិញដែលជាអ្នកតំឡើងម៉ាស៊ីនក្នុងទីក្រុងខាងលើ​បាននិយាយថា វាពិតជាឆ្ងាញ់ និងជាអាហារសម្រន់ដែលពោរពេញទៅដោយប្រូតេអ៊ីន និងសារធាតុរ៉ែផងដែរ។ ហើយវាគឺជាក្ដីសង្ឃឹមរបស់គាត់ថាការបរិភោគសត្វល្អិតចេញពីកំប៉ុង នឹងក្លាយជាការទទួលយកបានយ៉ាងទូលំទូលាយផងដែរ៕

ប្រភព: thethaiger / straitstimes

សូមទស្សនារូបភាពខាងក្រោម៖