ពិភពលោកផ្លាស់ប្ដូរ! សូម្បីស្លាបរបស់សត្វកន្ទុំរុយ ចាប់ផ្ដើមហើរពណ៌ ដោយសារបញ្ហាធំមួយនេះ

បរទេស៖ បញ្ហាអាកាសធាតុកំពុងធ្វើឲ្យមានការផ្លាស់ប្ដូររូបរាងរបស់សត្វកន្ទុំរុយឈ្មោល និងពីរបៀបដែលពួកវាស្វែងរកគ្នីគ្នា នេះបើយោងតាមការសិក្សាថ្មីមួយ។ ជាធម្មតា កន្ទុំរុយឈ្មោលមានក្បាច់ក្រឡាស្លាបពណ៌ខ្មៅ សម្រាប់ទាក់ទាញគ្នីគ្នាវា និងបំភិតបំភ័យសត្រូវរបស់វាផងដែរ។ ទោះជាយ៉ាងណា ក្រុមអ្នកស្រាវជ្រាវបានកត់សម្គាល់ថា កន្ទុំរុយឈ្មោលនៅក្នុងតំបន់ដែលមានអាកាសធាតុក្ដៅ កំពុងវិវត្តលែងសូវមានពណ៌និងក្រឡាច្បាស់។

គួរកត់សម្គាល់ថា សត្វញីវិញមិនមានការវិវត្តបែបនេះនោះទេ។ ខណៈពេលសារធាតុពណ៌ខ្មៅបានជួយកន្ទុំរុយឈ្មោលស្វែងរកគ្នីគ្នា និងជួយការពារប្រឆាំងនឹងគូប្រជែង វាក៏បានធ្វើឲ្យសត្វកន្ទុំរុយកាន់តែក្ដៅ រហូតក្ដៅជាងមុនដល់២អង្សាសេ។ ការកើនកម្ដៅបានធ្វើឲ្យប៉ះពាល់ដល់ស្លាបរបស់ពួកវា កាត់បន្ថយសមត្ថភាពក្នុងការហោះហើរ និងអាចឈានទៅរកសេចក្ដីស្លាប់ផងដែរ នេះបើតាមការចុះផ្សាយរបស់សារព័ត៌មាន The Guardian។

ក្រុមអ្នកស្រាវជ្រាវបានប្រើប្រាស់មូលដ្ឋានទិន្នន័យមួយ ដែលរួមបញ្ចូលប្រភេទសត្វកន្ទុំរុយជាង៣០០ ព័ត៌មានទីតាំងរបស់ពួកវា និងអាកាសធាតុ ហើយបានប្រៀបធៀបពណ៌ស្លាបនៃកន្ទុំរុយចំនួនជិត៣,០០០ក្បាល ពីប្រភេទផ្សេងៗទៀត។ បន្ទាប់មក ពួកគាត់បានប្រៀបធៀបពណ៌ស្លាបនៃសត្វកន្ទុំរុយ ដែលកើតនៅក្នុងតំបន់អាកាសធាតុក្ដៅឬត្រជាក់ ហើយបានរកឃើញថា សត្វកន្ទុំរុយមានសីតុណ្ហភាពក្ដៅជាង កំពុងវិវត្តដោយស្លាបមានសារធាតុខ្មៅតិច៕

ប្រភព: The Hill