ថៃ៖ សមាគមបាល់ទាត់ថៃ (FAT) បានចេញសេចក្តីប្រកាសផ្លូវការចំពោះអវត្តមានខ្សែការពារបទពិសោធន៍ជោគជាំ Theerathon Bumathan នឹងមិនចូលរួមជួយក្រុមជម្រើសជាតិដំរីសឹកថៃ លេងវគ្គជម្រុះទៅកាន់ FIFA World Cup 2022 ដែលនៅសេសសល់នោះឡើយ។ 

បើតាមប្រភពច្បាស់លាស់ និងការបង្ហាញឲ្យដឹងចំពោះមូលហេតុដែលកីឡាករវ័យ ៣១ ឆ្នាំខាងលើបដិសេធធ្វើ​ដំណើរ​​មករួមក្រុមជម្រើសជាតិ ដោយសារតែគោលការណ៍ថ្មីរបស់រាជរដ្ឋាភិបាលថៃ ដែលបានកំណត់រាល់អ្នកដំណើរ​មកពី​បរទេសចូលក្នុងប្រទេសថៃ តម្រូវឲ្យធ្វើចត្តាឡីស័ក ១៤ ថ្ងៃ ដើម្បីបញ្ចៀសពីការឆ្លងជំងឺកូវីដ-១៩។ 

បច្ចុប្បន្នភាពកីឡាករ Theerathon Bunmathan ដែលមានតំណែងជាខ្សែការពារស្លាបឆ្វេងរូបនេះ កំពុងប្រកប​អាជីព​នៅក្លិប​លីគកំពូលជប៉ុន Yokohama F.Marinos ។ ក្នុងករណីធ្វើចត្តាឡីស័កបែបនេះ អាចនឹងធ្វើឲ្យរូបគាត់​ខកខាន​​រយៈពេលយូរក្នុងការវិលត្រឡប់ទៅបំពេញការងារឲ្យក្លិប។ 

គួរបញ្ជាក់ផងថា ក្រុមជម្រើសជាតិថៃនៅសល់ភារកិច្ច ៣ ប្រកួតទៀត ដោយត្រូវធ្វើដំណើរទៅលេងនៅទឹកដីកណ្តាល​នា​ប្រទេសអារ៉ាប់រួម ហើយត្រៀមខ្លួនតទល់នឹង ឥណ្ឌូនេស៊ី ម្ចាស់ផ្ទះអារ៉ាប់រួម និងម៉ាឡេស៊ី។ ការប្រកួតនឹងរៀបចំចាប់​ពីថ្ងៃ ៣ ដល់ថ្ងៃទី ១៥ ខែមិថុនា ឆ្នាំ ២០២១ ខាងមុខនេះ៕