ហ្វេនៗរំភើបមិនស្ទើរ! ក្រោយ Hawkeye បង្ហាញឈុតពណ៌ស្វាយថ្មីរបស់ខ្លួនកាន់តែដូចទៅក្នុង Comic ដើមរបស់គេ

បរទេស៖ លោកអ្នកប្រិយមិត្តប្រាកដជាបានស្គាល់មកហើយនូវកំពូលវីរបុរសរបស់ Marvel ដែលជាមនុស្សធម្មតាប៉ុន្តែមានសមត្ថភាពពូកែបាញព្រួញជាសមាជិកម្នាក់របស់ Avenger ម្នាក់ដែរនោះគឺ Clint Barton ឬមានឈ្មោះជា Hero ថា Hawkeye សម្ដែងដោយលោក Jeremy Renner បើប្រៀបធៀបសមាជិកដើមទាំង ៦នាក់របស់ Avenger វីរបុរសមួយរូបនេះពុំសូវទទួលបានការចាប់អារម្មណ៍ខ្លាំងឬត្រូវបានលើកតំកើនច្រើនឡើយ ក៏ប៉ុន្តែពេលនេះ Hawkeyes មានខ្សែភាពយន្តទោលផ្ទាល់ខ្លួន ហើយដែលនឹងបង្ហាញវត្តមានបន្តជំនាន់របស់គេថែមទៀតផង។

ទោះជាយ៉ាងណា វត្តមានរបស់ Hawkeye នៅក្នុងខ្សែភាពយន្តផ្សេងៗ របស់ MCU យើងសង្គេតឃើញថាតួអង្គ Hawkeye ពុំមានឯកសណ្ឋានឬឈុត Hero របស់ខ្លួនដូចទៅក្នុង Comics ឡើយពោលគឺយើងភាគច្រើនឃើញវត្តមានរបស់គេក្នុងឈុតពណ៌ខ្មៅជាជាងពណ៌ស្វាយដែលជាពណ៌តំណាងឱ្យ Hawkeye នៅក្នុង Comics។

យ៉ាងណាមិញ នាថ្មីៗក្រោយពីការប្រកាសថាបានបញ្ចប់នៃការថតពេលនេះប្រិយមិត្តអ្នកគាំទ្រ Hawkeye ពិតសប្បាយចិត្តពេកក្រៃជាថ្មីក្រោយពីបានឃើញឈុតថ្មីរបស់ Hawkeye តាមរយៈរូបភាពក្រៅឆាកថ្មីដែលវាគឺពិតជាមានលក្ខណៈដូចទៅនឹង Comic មែនទែន ថែមទាំងបានបញ្ចូលពណ៌ស្វាយដែលតំណាងឱ្យតួអង្គនេះផងដែរ៕