បន្ទាប់ពីរៀបការបាន ១ ឆ្នាំ! ពេលនេះ Mew Nittha បង្ហើបថា គ្រោងផ្អាកសម្តែង និងត្រៀមយកកូនចំនួន....

ថៃ៖ ថ្វីបើតារាស្រីរាងតូចច្រឡឹង មុខខ្យូតៗ និងមានកាយវិកាយដ៏ក្រមិចក្រមើមគួរឲ្យស្រលាញ់ Mew Nittha បានចូលរោងការប្រមាណជាង ១ ឆ្នាំក៏ពិតមែន ប៉ុន្តែសម្រាប់ប្រជាប្រិយភាព និងកេរ្តិ៍ឈ្មោះរបស់តារាស្រីរូបនេះនៅតែមានភាពល្បីល្បាញដដែល។ មិនតែប៉ុណ្ណោះឃើញថា បច្ចុប្បន្ននេះនាងកាន់តែមមាញឹកជាមួយការថតរឿង និងថតផ្សាយពាណិជ្ជកម្មឲ្យក្រុមហ៊ុនផលិតផលជាច្រើនជាបន្តបន្ទាប់ផងដែរ ធ្វើឲ្យមហាជនយល់ថា Mew មមាញឹកជាមួយការងារខ្លាំងពេក ទើបមិនទាន់គិតពីគម្រោងយកកូនដូចតារាស្រីរៀមច្បងដទៃៗទៀត។

តួយ៉ាង កាលពីថ្មីៗនេះស្រាប់តែ Mew បានផ្តល់កិច្ចសម្ភាសន៍ជាមួយអ្នកសារព័ត៌មានថា នាងកំពុងត្រៀមយកបុត្រហើយ ប៉ុន្តែរង់ចាំពិគ្រោះនិងពិភាក្សាជាមួយគ្រូពេទ្យជាមុនសិន។ ហើយនាងក៏បានបន្តថា រវាងនាងនិងស្វាមីគឺចង់បានកូនចំនួន ២ ពោលគឺកូនប្រុសម្នាក់ និងកូនស្រីម្នាក់។

ទន្ទឹមនឹងនោះផងដែរ Mew ក៏បានជម្រាបដល់មហាជនថា បច្ចុប្បន្ននេះនាងកំពុងជាប់ថតរឿងភាគថ្មីមួយមានចំណងជើងថា «Duang Tah Tee Sarm» ដើរតួសម្តែងជាមួយលោក James Ma ដែលរឿងនេះនឹងថតចប់ក្នុងពេលឆាប់ៗនេះហើយ។ លើសពីនោះ Mew ក៏បានបន្តថា នាងប្រហែលជាផ្អាកពីការសម្តែងមួយរយៈសិន ប៉ុន្តែមិនទាន់ច្បាស់ថាពេលណាទើបវិលត្រឡប់មកសម្តែងជាថ្មីឡើយ៕

សូមទស្សនារូបភាពខាងក្រោមនេះ​ ៖