អស្ចារ្យ! មនុស្សម្នាគ្រប់ទិសទីរួមគ្នាបំបែកសារសម្ងាត់ បង្កប់ដោយអង្គការណាសានៅក្នុងឆ័ត្រយោងរបស់យាន Perseverance

បរទេស៖ កាលពីសប្តាហ៍មុន យានស្រាវជ្រាវ Perseverance របស់អង្គការណាសាបានចុះចតដោយសុវត្ថិភាពនៅលើភពអង្គារ ដែលក្នុងការចុះចតនេះមានជំនួយពីឆ័ត្រយោងពណ៌សនិងក្រហមមួយដែលជួយយោងវាពេលធ្លាក់ចុះ។ ប៉ុន្តែឆ័ត្រយោងនេះមិនត្រឹមតែជួយការពារយាន Perseverance តែប៉ុណ្ណោះទេ វាក៏មានលាក់សារអាថ៌កំបាំងផងដែរ។

មហាជនបានឃើញឆ័ត្រយោងពណ៌សនិងក្រហមនេះជាលើកដំបូងក្នុងវីដេអូដែលណាសាបានចេញពីការចុះចតរបស់យានកាលពីថ្ងៃចន្ទ ក្រោយមកមន្ត្រីអង្គការណាសាលោក Allen Chen បានបង្ហើបប្រាប់អ្នកគាំទ្រក្នុងសន្និសីទកាសែតមួយនៅថ្ងៃដដែលថា មានសារសម្ងាត់នៅក្នុងឆ័ត្រយោងនោះ ហើយបានអញ្ចើញមនុស្សម្នាគ្រប់ទិសទីឱ្យចូលរូមបង្ហាញស្នាដៃដោយស្វែងរក និងបំបែកសារសម្ងាត់នេះ។

ប៉ុន្មានម៉ោងក្រោយមក អ្នកគាំទ្រលើអ៉ីនធើណេតជាច្រើនបានបំបែកវាបានដោយជោគជ័យ។

ពណ៌ឆ្លាស់គ្នាលើឆ័ត្រយោងតាមពិតគឺបង្កើតបានជាឃ្លាថា “DARE MIGHTY THINGS” ដែលជាបាវចនានៃមន្ទីរពិសោធន៍ Jet Propulsion Laboratory (JPL)​ របស់អង្គការណាសា។

Maxence Abela និស្សិតព័ត៌មានវិទ្យាម្នាក់បានបង្ហោះនៅលើ Twitter ថា គាត់និងឪពុករបស់គាត់បានរកឃើញថាពាក្យទាំងនេះត្រូវបានលាក់ជាគំរូ 10-bit នៅក្នុងរង្វង់បួនធំៗរបស់ឆ័ត្រយោង ដោយពួកគេបានបម្លែងពណ៌ក្រហមនិងសទៅជាលេខកូដ binary code ហើយកូដ 10-bit ទាំងនោះត្រូវគ្នានឹងតួអក្សរផ្សេងៗដែលប្រកបចេញជាពាក្យស្លោកថា DARE MIGHTY THINGS។

អ្នកវិទ្យាសាស្ត្រ Emily Calandrelli បានបង្ហោះ Tik Tok ពន្យល់អំពីការរកឃើញរបស់ Abela។ លោកស្រីក៏បានប្រាប់ផងដែរថា រង្វង់ចុងក្រោយនៃឆ័ត្រយោងគីបានបង្កប់លេខកូអ័រដោណេរបស់ទីស្នាក់ការបេសកកម្ម JPL នៅភាគខាងត្បូងរដ្ឋកាលីហ្វ័រញ៉ា។  

កូអ័រដោនេគឺជាបំណែកចុងក្រោយនៃសារសម្ងាត់ ហើយក៏ត្រូវបានរកឃើញដោយមនុស្សមួយក្រុមនៅ reddit ព្រមទាំងត្រូវបានបង្ហាញដោយលោក Paul Ramirez របស់ JPL នៅលើ Twitter ផងដែរ។ 

ជាចុងក្រោយ លោក Adam Stelzner ដែលជាប្រធានវិស្វករនៃក្រុមយាន Perseverance បានបញ្ជាក់ថាការរកឃើញរបស់ Abela និងអ្នកគាំទ្រលើអ៉ីនធើណេតផ្សេងៗទៀតពិតជាត្រឹមត្រូវ ដោយបង្ហោះរូបភាពនៃឆ័ត្រយោងជាមួយពាក្យនិងកូអ័រដោនេ។ 

នេះពិតជាបញ្ចាក់ឱ្យឃើញថា គ្មានអ្វីដែលមហាជនលើអ៉ីនធើណេតមិនអាចធ្វើបាននោះទេ៕