ភ្នំពេញ៖ ក្រោយពីឃើញមានការផ្សព្វផ្សាយនូវខ្សែភាពយន្តភាគថ្មីរបស់ស្ថានីយទូរទស្សន៍ហង្សមាសដែលត្រៀមនឹងចាក់បញ្ចាំងនាពេលដ៏ខ្លីខាងមុខនេះ លោក សុខ ចាន់ផល ដែលជាអតីតអ្នកនិពន្ធទំនុកច្រៀងដែលមានស្នាដៃល្បីៗជាច្រើននៅក្នុងផលិតកម្មរស្មីហង្សមាស បានបញ្ចេញអារម្មណ៍រំភើបជាខ្លាំង ព្រោះតែភាពយន្តភាគថ្មីដែលមានចំណងជើងថា « ខ្ញុំមានញាណលើស» នេះ គឺជាស្នាដៃនិពន្ធរបស់លោកដែលបានសរសេរចប់តាំងពីឆ្នាំ២០១៧ មកម្ល៉េះ។
ភ្ជាប់ជាមួយនឹងអារម្មណ៍រំភើបមួយនេះ លោក សុខ ចាន់ផល ក៏បានថ្លែងអំណរគុណទៅដល់អ្នកគ្រប់គ្រងរបស់ក្រុមហ៊ុនហង្សមាស ក៏ដូចជាក្រុមការងារទាំងអស់ដែលបានរួមសហការ និងផលិតភាពយន្តមួយនេះឡើងលេចចេញជារូបរាងសម្រាប់ត្រៀមអង្រួនអារម្មណ៍របស់ទស្សនិកជនដែលនិយមតាមដាន និងគាំទ្ររឿងភាគខ្មែរ។
សូមបញ្ជាក់ផងដែរថា ភាពយន្តភាគ « ខ្ញុំមានញាណលើស» នេះនឹងមានផ្សាយជូនទស្សនាចាប់ពីថ្ងៃទី៨ ខែកុម្ភៈ ខាងមុខនេះ ដោយមានការចូលរួមសម្តែងដោយតារាចម្រៀងប្រុសស្រីល្បីឈ្មោះជាច្រើនរូបរបស់ផលិតកម្មហង្សមាសដូចជា៖ លោក ណុប បាយ៉ារិទ្ធ លោក ឆន សុវណ្ណរាជ អ្នកនាង សុខ ស្រីនាង លោក គ្រី ថៃពៅ កញ្ញា ប៉ាច គីមមួយ លោក សយ រតនៈ និងតារាកិត្តិយសជាច្រើនទៀតផងដែរ៕
សូមទស្សនារូបភាពខាងក្រោម៖
