អង់គ្លេសប្រកាសដាក់លក់លេណដ្ឋានក្រោមដីក្នុងតម្លៃជិត ៥ ម៉ឺនដុល្លារ សម្រាប់លាក់ពួនពីជំងឺកូវីដ ១៩

អង់គ្លេស៖ លេណដ្ឋានក្រោមដីជម្រៅ ៤ ម៉ែត្រជាងស្ថិតនៅភូមិ  St Agnes ខាងជើងឆ្នេរនៃស្រុក Cornwall ត្រូវបានគេប្រកាសដាក់លក់ក្នុងតម្លៃជិត ៥ ម៉ឺនដុល្លារអាមេរិក ដែលជាកន្លែងលាក់ខ្លួនដ៏សុវត្ថិភាពបំផុតសម្រាប់អ្នកដែលចង់គេចវេសពីការឆ្លងជំងឺកូវីដ១៩។

នាយកផ្នែកដេញថ្លៃ លោក Adam Cook បានបញ្ជាក់ថា លេណដ្ឋាននេះនឹងត្រូវដាក់ប្រកាសដេញថ្លៃលក់ក្នុងតម្លៃប្រមាណជិត ៥ ម៉ឺនដុល្លារអាមេរិក ដែលក្នុងនោះវាមានគ្រែតូចបន្សល់ទុកតាំងពីសម័យសង្គ្រាម និងបង្គន់ខ្នាតតូច ហើយមនុស្សអាចចូលមកដល់ក្នុងលេណដ្ឋានជម្រៅ ៤ ម៉ែត្រនេះបានតាមរយៈការឡើងចុះតាមកាំជណ្តើរ។ យ៉ាងណាមិញ ដោយសារតែវាត្រូវបានគេទុកចោលអស់រយៈពេលជិត ៣០ ឆ្នាំមកហើយនោះ វាត្រូវការជួសជុល និងលាបថ្នាំខ្លះៗដើម្បីកែលម្អឡើងវិញ ដែលវាពិតជាសាកសមល្មមសម្រាប់មនុស្សពីរនាក់រស់នៅ។

គួរបញ្ជាក់ថា លេណដ្ឋានបេតុង ត្រូវបានគេសាងសង់ក្នុងឆ្នាំ ១៩៦១ កំឡុងសម័យសង្គ្រាមត្រជាក់ក្នុងគោលបំណងផ្តល់ជម្រកដល់កងសង្កេតការណ៍អង់គ្លេស Royal Observation Corps សម្រាប់គេចខ្លួនពីគ្រាប់បែកបរិមាណូនុយក្លេអ៊ែរ។ វាត្រូវបានបំពាក់ទៅដោយគ្រឿងសម្ភារផ្សេងៗ ដូច្នេះហើយអ្នករស់រានមានជីវិតពីសង្គ្រាមនុយក្លេអ៊ែរអាចរស់នៅទីនោះបានរាប់ខែ។ លើសពីនេះ លេណដ្ឋានក៏មានវិទ្យុ និងទូរសព្ទ ដើម្បីផ្តល់ការងាយស្រួលដល់កងសង្កេតការណ៍ក្នុងការទំនាក់ទំនងជាមួយលេណដ្ឋានដទៃទៀត និងពិភពខាងក្រៅផងដែរ៕

សូមទស្សនារូបភាពខាងក្រោម៖