SM រងការចោទប្រកាន់ថា លួចចម្លងជាថ្មី ខណៈ Teaser MV របស់ aespa ទើបតែចេញផ្សាយ!

កូរ៉េខាងត្បូង ៖ ជាមួយនឹងការបង្ហាញខ្លួន របស់ក្រុមនារីថ្មីគឺ aespa ដែលស្ថិតនៅក្រោមការគ្រប់គ្រងរបស់ផលិតកម្ម SM Entertainment កំពុងតែទទួលបានការគាំទ្រយ៉ាងខ្លាំង ជាមួយនឹងការចែករំលែករូបភាព និងវីដេអូ Teaser របស់ពួកគេ។

ថ្មីៗនេះ ក្រុមតារាចម្រៀងស្រីថ្មីចុងក្រោយ របស់ផលិតកម្ម SM បានបង្ហាញវីដេអូចម្រៀង សម្រាប់បទដំបូងរបស់ពួកគេ ដែលមានចំណងជើងថា  Black Mamba តែជាអកុសលនៅពេលដែល MV Teaser នេះបានផ្សព្វផ្សាយ អ្នកគាំទ្រ Kpop ជាច្រើនបានចាប់ផ្តើមប្រៀបធៀបឈុតវីដេអូនេះ ទៅនឹងវីដេអូចម្រៀង POP / STARS របស់ក្រុម  K-DA ។

ជាមួយគ្នានេះដែរ អ្នកគាំទ្រក៏បានចង្អុលបង្ហាញ ពីភាពស្រដៀងគ្នាយ៉ាងខ្លាំង ជាមួយនឹងស្ទាយ៏នៃការថត រួមជាមួយនិងទីតាំងផ្សេងៗក្នុង MV ទាំងពីរ។

ចង់ដឹងថាតើ ក្នុងMVទាំងពីរ មានភាពស្រដៀងគ្នាកម្រិតណា? 

សូមទស្សនារូបភាព និងការបង្ហាញដូចខាងក្រោម  ៖

អំពីទីតាំងដែលស្ថិតនៅលើរថភ្លើងក្រោមដី ។

ការបាញ់ពណ៌ចម្រុះ និងគំនូរតាមទីសាធារណៈដែលត្រូវបានប្រើ ។

រួមទាំងការប្រើប្រាស់រូប របស់ Mamba ដែលមើលទៅពិតជាស្រដៀងគ្នាយ៉ាងខ្លាំងជាមួយនិងក្រុម  K / DA ។

ការប្រើប្រាស់ពស់ក្នុងរថភ្លើងក្រោមដី ។

ទន្ទឹមនឹងនេះដែរ អ្នកគាំទ្រមួយចំនួនក៏បាន ចោទជាសំណួរទៅកាន់ផលិតកម្ម SM Entertainment ថា ៖

តើ SM ជាក្រុមហ៊ុនធំមិនមែនឬ? ហេតុអ្វីបានជាខ្វះភាពច្នៃប្រឌិតក្នុងការធ្វើ MV នេះទៅវិញ ?

មិចក៏ពួកគេទៅជាបែបនេះ?

តើពួកគេកំពុងតែលេងសើចមែនទេ? ចាប់តាំងពី AVATAR រហូតដល់ MV អ្វីគ្រប់យ៉ាងគឺជាន់គ្នា តើពួកគេអាចទទួលថាពួកគេ មិនបានលួចចម្លងដោយរបៀបណា? វាមានភាពស្រដៀងគ្នាច្រើនណាស់។

តើពួកគេជាក្រុម K / DA ថ្មីឬ?

តើពួកគេពិតជាបានធ្វើបែបនេះមែនទេ ... នេះគឺជាក់ស្តែងណាស់ តើពួកគេកំពុងធ្វើអ្វី?

គួរបញ្ជាក់ផងដែរថា នេះមិនមែនជាលើកទីមួយទេដែលក្រុម aespa ប្រឈមមុខនឹងការចោទប្រកាន់ ពីការលួចចម្លងពីក្រុម K / DA វាត្រូវបានគេនិយាយដោយឥតឈប់ឈរ ចាប់តាំងពីគំនិត  concept “AI” របស់ aespa ត្រូវបានបង្ហាញដំបូង…

មិនទាន់អស់ទេ ជាមួយនឹងការចេញផ្សាយ MV teaser នេះដែរ មានសិល្បករម្នាក់ ដែលមកពីប្រទេសអាឡឺម៉ង់ គឺលោក Timo Helgert បានធ្វើការបង្ហោះខ្លឹមសារនៅលើ Instagram របស់លោកថា ការងាររបស់លោកត្រូវបានគេនិយាយថាមានរូបរាង​ និងខ្លឹមសារស្ទើរតែដូចគ្នាបេះបិទទៅ MV របស់ក្រុម aespa ។

លោក Timo Helgert បានអះអាងថាវា ហាក់ដូចជា ផលិតកម្ម SM Entertainment បានចំលងស្នាដៃរបស់លោកដោយបញ្ជាក់ថា ពួកគេមិនបានស្នើសុំគាត់ទេ ហើយពួកគេដូចជាមិនបានធ្វើការលើ MV នេះដែរ។

ខណៈពេលដែលអ្នកគាំទ្រ កំពុងតែទាមទាការពន្យល់ និងបកស្រាយនោះ ផលិតកម្ម SM Entertainment មិនទាន់មានការឆ្លើយតប ទៅនឹងការចោទប្រកាន់នេះនៅឡើយទេ ៕