ភ្នំពេញ ៖ កីឡាករកម្ពុជាមិនតិចនាក់ទេ ដែលធ្លាប់ចូលរួមប្រកួត នៅសង្វៀនខ្សែរាជវង្សថៃ គឺសង្វៀនThaifight ពោលគឺកម្រទទួលបានជ័យជម្នះ ត្រឡប់មកមាតុភូមិវិញណាស់ ។ ទន្ទឹមនឹងនេះផងដែរ យើងឃើញថាកីឡាករកម្ពុជា២រូប ដែលធ្លាប់ទទួលបានជ័យជម្នះ ពីសង្វៀនថៃមួយនេះ គឺមានកីឡាករ សេន ប៊ុនថេន និងកីឡាករ កែវ រំចង ។

អ្នកលេងជើងរន្ទះ គឺកីឡាករ សេន ប៊ុនថេន ធ្លាប់បានឡើងសង្វៀនមួយនេះចំនួន៣ដង ដោយចាញ់ពិន្ទុពីដង គឺចាញ់កីឡាករកូនកាត់ថៃ-បារាំង កីឡាករ អង់ទួនពីនតូ និងលើកចុងក្រោយឈ្នះពិន្ទុលើកីឡាករជនជាតិជប៉ុន HIROKI ក្នុងឆ្នាំ២០១៤ ។

ចំណែកឯខ្លាកំណាចខេត្តបាត់ដំបងវិញ គឺកីឡាករ កែវ រំចង ធ្លាប់ឡើងសង្វៀនមួយនេះ ចំនួន៤ដង ដោយលើកទី១ ចាញ់សន្លប់ក្រោមកណ្ដាប់ដៃ អ្នកប្រដាល់កំព្យូទ័រ យ៉ត សែនក្លៃ ឈ្នះពិន្ទុកីឡាករភូមា មឿនជោ ចាញ់និងឈ្នះកីឡាករកំពូលឌឺរបស់ថៃ អ៊ីខ្យូសាំង ។

សូមបញ្ជាក់ថា នេះគឺយើងរៀបរាប់តែការប្រកួតលើសង្វៀននេះ ក្រៅប្រទេសប៉ុណ្ណោះ មិនបានរាប់ចូលព្រឹត្តិការណ៍ Khmer Thai fight នោះទេ ៕