ប្រធានក្លិប​បិសាច​ក្រហម​ ​យល់​​យ៉ាង​​ណា​​​ចំពោះ​​ការ​​ដឹក​នាំ​​​រ​បស់​ Solskjaer​​?​

អ្នកចាត់ការទូទៅសញ្ជាតិន័រវេសរបស់ក្លិបបិសាចក្រហម Manchester United បានរងនូវការរិះគន់យ៉ាងខ្លាំង បន្ទាប់​ពី​ការដឹកនាំក្រុមក្នុងលទ្ធផលមិនសមប្រកបទាល់តែសោះ ដោយពេលខ្លះលេងប៉ះក្រុមខ្លាំងបែរជាឈ្នះ ឯពេល​ប៉ះក្រុមកម្រិតទាប​ បែរជាចាញ់ទៅវិញមិនថាក្នុងក្របខ័ណ្ឌ Premier League និង Champions League ។

យោងតាមរបាយការណ៍ជាច្រើនបានលើកឡើងថា អតីតគ្រូបង្វឹកក្លិប Tottenham Hotspurs លោក Mauricio Pochettino អាចនឹងជាប់ទាក់ទងនឹងការមកជំនួសកន្លែង Solskjaer ប៉ុន្តែប្រធានក្លិបបិសាចក្រហមលោក Woodward បានបដិសេធការអះអាងទាំងនោះចោល។

នៅក្នុងសេចក្ដីថ្លែងការណ៍មួយ ដែលចេញផ្សាយអមជាមួយនឹងស្ថានភាពហិរញ្ញវត្ថុប្រចាំត្រីមាស​ដំបូងរបស់ក្លិប​បាន​និយាយថា៖ «នៅលើទីលានខណៈពេលដែលនៅតែមានការខិតខំប្រឹងប្រែងកាន់តែ​ខ្លាំងដើម្បីទទួលបាននូវលទ្ធផល​ល្អជាប់ៗគ្នា យើងនៅតែប្តេជ្ញាទទួលយកនូវយុទ្ធសាស្ត្រនៃការដឹកនាំរបស់គ្រូបង្វឹក ហើយយើងក៏នៅតែបន្ត​អភិវឌ្ឍ​ក្រុមជានិច្ច»។

«យើងខកខានលេងនៅមុខអ្នកគាំទ្ររបស់យើងយូរមកហើយ ហើយយើងក៏កំពុងខិតខំរួមគ្នាជាមួយគណៈគ្រប់គ្រង និងអាជ្ញាធរពាក់ព័ន្ធដើម្បីធានាថាអ្នកគាំទ្រអាចវិលត្រឡប់មកទស្សនាវិញដោយសុវត្ថិភាព» ៕