សិស្សសំណព្វ! លោក Ancelotti គ្រោងនឹងកោះហៅអតីតកីឡាករ R.Madrid រូបនេះ ឲ្យជាប់ជម្រើសជាតិប្រេសុីលឡើងវិញ

ប្រេសុីល៖ គ្រូបង្គោលថ្មីរបស់ក្រុមជម្រើសជាតិប្រេសុីល លោក Carlo Ancelotti ត្រូវបានគេរាយការណ៍ថា គាត់គ្រោងនឹងស្វាគមន៍ Casemiro ត្រឡប់មកកាន់ក្រុមរហស្សនាមសាំបាសារជាថ្មីនាពេលឆាប់ៗនេះ ពេលដែលលោកចាប់ផ្តើមចូលកាន់តំណែង។

ជាការពិតណាស់ កាលពីម្សិលមិញនេះ គឺ សហព័ន្ធបាល់ទាត់នៃប្រទេសប្រេសុីល បានប្រកាសជាផ្លូវការហើយអំពីការតែងតាំងលោក Ancelotti ជា គ្រូបង្គោល ខណៈ លោកនឹងចូលមកកាន់តំណែងចាប់ពីថ្ងៃទី ២៦ ខែឧសភា នេះតទៅ ដើម្បីចាប់ផ្តើមរៀបចំក្រុមចូលរួមក្នុងព្រឹត្តិការណ៍ World Cup ឆ្នាំ២០២៦។

ទាក់ទងនឹងរឿងខាងលើ បើយោងទៅតាមការចុះផ្សាយរបស់ Fabrizio Romano បានទម្លាយថា លោក Ancelotti នឹងធ្វើការពិភាក្សាគ្នាជាមួយ Casemiro ដើម្បីនាំយករូបគេមកកាន់ក្រុមជម្រើសជាតិប្រេសុីលជាថ្មី ក្រោយតារាឆ្នើម Man UTD ខាងលើខកខានជាប់ជម្រើសជាតិអស់មួយរយៈ ខណៈ Casemiro ធ្លាប់ជាកូនសិស្សសំណព្វរបស់លោក Ancelotti អំឡុងពេលអ្នកទាំងពីរធ្វើការជាមួយនៅ Real Madrid ដោយលោកគិតថា វត្តមានរបស់ Casemiro នឹងអាចជួយផ្តល់បទពិសោធន៍បន្ថែមមកកាន់ក្រុម ស្របពេល Neymar Jr. ក៏នៅតែដើរតួយ៉ាងសំខាន់ក្នុងការជួយក្រុមរបស់លោកផងដែរ៕