អេស៉្បាញ៖ មហាជនអ្នកប្រើប្រាស់បណ្ដាញសង្គមជាច្រើន បានសម្ដែងការរំជួលចិត្ត និងក្រៀមក្រំយ៉ាងខ្លាំង ជុំវិញនឹងវីដេអូឃ្លីបមួយ ដែលបានថតបង្ហោះចែកចាយនូវសកម្មភាព លោកយាយម្នាក់ឈ្មោះ ម៉ាតា ដែលជាអតីតអ្នករាំរបាំបាឡេ និងមានជំងឺវង្វេងវង្វាន់ បានចាំក្បាច់រាំកាលពីច្រើនឆ្នាំមុន នៅពេលបានឮចង្វាក់តន្ត្រី។

តាមប្រភពព័ត៌មានបានឲ្យដឹងថា វីដេអូឃ្លីបនេះ ត្រូវបានថតឡើងតាំងពីលោកយាយនៅមានជីវិតម៉្លេះ មុនពេលគាត់ស្លាប់បាត់បង់ជីវិតក្នុងឆ្នាំ២០១៩ ហើយទើបតែបង្ហោះចែកចាយកាលពីប៉ុន្មានថ្ងៃកន្លងទៅនេះ ដោយទទួលបានការចាប់អារម្មណ៍យ៉ាងខ្លាំង។

ជាក់ស្ដែងតាមរយៈ​វីដេអូឃ្លីប បង្ហាញឲ្យឃើញថា បុរសម្នាក់ដែលមកពីខាងសប្បុរសធម៌ បានដាក់កាសត្រចៀកឲ្យលោកយាយម៉ាតាស្ដាប់ ដែលលោកបានចាក់ចង្វាក់តន្ត្រីរបស់របាំបាឡេ។ រំពេចនោះ លោកយាយហាក់ដូចជាមានមានសោកសៅ និងមានការចងចាំនូវក្បាច់រាំឡើងវិញ ដែលគាត់បានកម្រើកដៃយឺតៗរាំទៅតាមចង្វាក់តន្ត្រី។ ហើយក្បាច់ទាំងនោះ គឺដូចទៅនឹងក្បាច់ដែលគាត់បានធ្វើការសម្ដែងលើឆាកនៅក្នុងឆ្នាំ១៩៦៧ផ្ទាល់តែម្ដង។ យ៉ាងណាមិញ បន្ទាប់ពីបញ្ចប់ការរាំរួចមក អ្នកដែលនៅជុំវិញគាត់ ក៏បានទះដៃអបអរទៅកាន់គាត់ផងដែរ៕

សូមទស្សនារូបភាពនិងវីដេអូខាងក្រោម៖