យល់ដឹង៖ អាចនិយាយបានថា សម័យនេះជា សម័យនៃបច្ចេកវិទ្យា របស់ប្រើប្រាស់ក៏ទំនើប ជាងមុនច្រើន មិនថាសម្ភារៈប្រើប្រាស់ ប្រចាំថ្ងៃក្នុងផ្ទះ ឬក៏ប្រព័ន្ធអេឡិចត្រូនិច ផ្សេងៗនោះទេ វាបានសម្រួលដល់ ភាពនឿយហត់ បង្កើនភាពងាយស្រួលនិង ជួយចំណេញពេលឲ្យអ្នក បានដល់មួយ ភាគធំឯណ្ណោះ ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ជាក់ស្តែង ដូចជាការលក់ តាមអនឡាញ ក្នុងពេលបច្ចុប្បន្ន អាជីវកម្មភាគច្រើន បានផ្លាស់ប្តូរមកធ្វើ ការផ្សព្វផ្សាយ និងចែកចាយលើ បណ្តាញសង្គមវិញ ដោយសារនេះជាតម្រូវ ការរបស់អតិថិជន ភាគច្រើន។ ហេតុដូចនេះ សម្រាប់អតិថិជនទូទៅ មានភាពងាយស្រួល កាន់តែខ្លាំង នៅពេលដែល ចង់ញុំាឬ ចង់ទិញសម្ភារៈប្រើប្រាស់ អ្វីមួយបើមិនចង់ ចំណាយពេលវេលា ទៅផ្សារទិញទេ អាចធ្វើការកម្មង់ តាមOnlineបាន ក្នុងនោះក៏មាននៅ សេវាកម្មដឹកជញ្ជូន ដល់កន្លែងថែមទៀត កាន់តែងាយស្រួល។
ក៏ប៉ុន្តែ ស្របពេលដែល អាជីវកម្មអនឡាញ ជាទីផ្សារធំទូលាយ និងបើចំហរមួយ ដែលមនុស្សភាគច្រើន តែងតែចំណាយពេល ទៅលើវានោះ គេក៏សង្កេតឃើញថា ខាងផ្នែកសីលធម៌នៃ អ្នកលក់និង អ្នកទិញក៏កាន់តែ ធ្លាក់ចុះដូចគ្នាដែរ។ សម្រាប់បុគ្គលជោគជ័យ ពិតប្រាកដ ដែលមានឈ្មោះល្បីៗ លើពិភពលោក គេបានឲ្យនិយមន័យលើ ការលក់ដូរថា អតិថិជនជាស្តេច ហេតុដូច្នេះសេ្តច ធ្វើអ្វីក៏មិនអាចខុសដែរ។
នេះមានន័យថា ក្នុងនាមអ្នកជា អ្នកលក់ត្រូវប្រើភាសា ឲ្យពិរោះពិសារ ជាមួយភ្ញៀវ សា្វគមន៍ និងទទួលភ្ញៀវដោយ ភាពកក់ក្តៅ ព្រោះនៅពេលដែល អ្នកបម្រើសេវាកម្មដល់ អតិថិជនរបស់ អ្នកបានល្អ នោះអ្នកនឹងមិនចាំបាច់ ហត់នឿយធ្វើ ការផ្សព្វផ្សាយច្រើននោះទេ តែអតិថិជនម្នាក់នោះនឹង ក្លាយខ្លួនទៅជា អ្នកផ្សព្វផ្សាយ ឲ្យហាងអ្នកដោយខ្លួនឯង ទៅកាន់មិត្តភក្តិ អ្នករួមការងារ និងសាច់ញាត្តិរបស់គេ អំពីសេវាកម្មដ៏ល្អរបស់ ហាងអ្នកដោយឯកឯង។
ក៏ប៉ុន្តែ ចំណុចនេះមិនមែន មានន័យថា ឲ្យអ្នកត្រូវអត់ធ្មត់ គ្រប់យ៉ាង ទោះបីភ្ញៀវធ្វើហួសហេតុ ខ្លាំងនោះដែរ។ តែក្នុងនាមជា អ្នកលក់ត្រូវមាន ចិត្តអំណត់ឲ្យធ្ងន់បន្តិច ព្រោះគេមានលុយ យកមកទិញ របស់ពីអ្នក ហើយអ្នកត្រូវការគេ តែបើបញ្ហា មិនអាចជៀសបាន ត្រូវធ្វើការដោះស្រាយ ដោយសតិមិនមែន ដោយខ្លៅនោះទេ។
សរុបមកការស្រែក ជេរប្រមាថទៅកាន់ អតិថិជន និងជាពិសេស ការដែលមិនទទួលយក នៅពាក្យរិះគន់ ពីអតិថិជន ហើយបែរជា យកមកតបត លើបណ្តាញសង្គមវិញនេះ គឺហាក់ប្រៀបដូចជា អ្នកកំពុងតែរៀបឥដ្ឋ មកបិទផ្លូវអាជីវកម្ម របស់អ្នកដូចគ្នាដែរ។ ព្រោះអ្នកបាន បង្ហាញពីអត្តចរឹកពិត របស់អ្នកឲ្យអតិថិជនដទៃទៀត បានឃើញនិងបានដឹង។ នៅពេលដែល អ្នកបង្ហាញពីភាពមិនល្អរបស់ អ្នកកាន់តែច្រើន ការទុកចិត្តនិងជំនឿដែល អតិថិជនធ្លាប់មាន មកលើអ្នកក៏នឹងត្រូវ បាត់បង់ម្តងបន្តិចៗ ដូចគ្នាដែរ។
អ្នកត្រូវដឹងថា នេះជាសវទី២១ ជាសម័យនៃទីផ្សារសេរី អតិថិជនមានជម្រើសច្រើនណាស់ ក្នុងការជ្រើសរើស ហើយប្រសិន បើផលិតផលគេល្អ ប្រហាក់ប្រហែលអ្នក ឬក៏បើទោះបី ពេលខ្លះផលិតផល គេអន់ជាងអ្នកបន្តិចក៏ដោយ តែបើការបម្រើសេវាកម្មរបស់ គេល្អជាងអ្នក នោះអតិថិជន របស់អ្នកនឹងរត់ទៅកន្លែងគេ ដោយខ្លួនឯង ហើយពេលនោះ ភាពខ្លាំង និងអំនួត ដែលអ្នកធ្លាប់តែមាន លើខ្លួនឯង ទុកអតិថិជនដូចជាសម្រាមនោះ ក៏នឹងលេងមានទៀតដែរ៕
Bong I.T