អបអរសាទរ Nicki Minaj សម្រាលកូនដោយស្ងាត់ៗ

បរទេស៖  យោងតាមសារព័ត៌មាន TMZ បានឱ្យដឹងថាតារាចម្រៀងរ៉េប Nicki Minaj បានសម្រាលកូនដំបូងរបស់នាងនៅមន្ទីរពេទ្យមួយក្នុងទីក្រុង Los Angeles សហរដ្ឋអាមេរិកកាលពីថ្ងៃទី ១ ខែតុលា ដោយជាលក្ខណៈឯកជន សូម្បីតែរូបភាព និងភេទរបស់ក្មេង ក៏មិនទាន់ដឹងនៅឡើយនោះទេ។

តាមប្រភពជិតស្និទ្ធ គ្រួសាររបស់តារាស្រីរ៉េប ជនជាតិអាមេរិករូបនេះ ពិតជាសប្បាយរីករាយណាស់។ ពួកគេចង់រក្សាព័ត៌មានជាលក្ខណៈឯកជន មិនទាន់បានចែករំលែកដល់អ្នកសារព័ត៌មានទេ ហើយប្រភពដដែលបានបន្ថែមទៀតថា សុខភាពទាំងម្តាយ និងទារក គឺមានសុខភាពយ៉ាងកត់សម្គាល់។

ជាក់ស្តែង ម្ចាស់បទ «Anaconda» រូបនេះ​ បានប្រកាសមានផ្ទៃពោះកាលពីខែកក្កដា នៅពេលនាងបានបញ្ចេញរូបថតស្លៀកឈុតប៊ីគីនីសក់ពណ៌លឿងនិងពោះធំ បានធ្វើឲ្យមហាជនមានការភ្ញាក់ផ្អើល ជាពិសេសនោះ ហ្វេនៗរបស់តារាស្រីរូបនេះ បានចូលរួមអបអរ ចំពោះដំណឹងល្អនេះផងដែរ។

គួរបញ្ជាក់ផងដែរ ក្នុងអំឡុងពេលមានផ្ទៃពោះនាង Minaj កម្រប្រើបណ្តាញសង្គម នាងឈប់សកម្មភាពនិងការងារទាំងអស់ហើយនាងគ្រាន់តែនៅផ្ទះដើម្បីរង់ចាំរហូតដល់ថ្ងៃសម្រាល កូនដំបូងរបស់នាងតែប៉ុណ្ណោះ ដោយកាលពីខែកញ្ញាឆ្នាំ ២០១៩ តារារ៉េបស្រីរូបនេះ បានប្រកាសចូលនិវត្តន៍ដើម្បីផ្តោតសំខាន់លើ ក្រុមគ្រួសាររបស់នាងតែម្តង៕

សូទស្សនារូបភាពខាងក្រោម៖