ត្រៀមលើកពានទៅហើយប៉ុន្តែ Ronaldo និង​មិត្តរួមក្រុមត្រូវខកចិត្តក្រោយចាញ់ Udinese យប់មិញ (មានវីដេអូ)

អ៊ីតាលី៖ ប្រសិនបើឈ្នះការប្រកួតយប់មិញនេះក្រុមសេះបង្កង់ Juventus នឹងមានពិន្ទុគ្រប់គ្រាន់ក្នុងការក្លាយជាម្ចាស់ជើងឯកលីគកំពូល Serie A ជាលើកទី៩ជាប់ៗគ្នារបស់ក្លិប។ ប៉ុន្តែលទ្ធផលមិនដូចការរំពឹងទុកនោះទេ ពោលគឺពួកគេបានភ្លាត់ចាញ់ក្រុម Udinese ក្រៅដីដោយលទ្ធផល២ទល់នឹង១។

ខ្សែការពារ Matthijs de Ligt បានឡើងមករកគ្រាប់បាល់ឲ្យ Juventus នាំមុខមុននៅនាទីទី៤២​ ដោយការស៊ុតបាល់រ៉ាពីលើដំបូលទូកផុតដៃអ្នកចាំទី។ យ៉ាងណាមិញចូលដល់តង់ទី២កីឡាករ Ilija Nestorovski រកបានគ្រាប់តាមស្មើឲ្យ Udinese ដោយការតែតចាក់អន្ទង់យ៉ាងស្អាតនៅនាទីទី៥២។ អ្វីដែលធ្វើឲ្យអ្នកគាំទ្រ Juventus ស្រងាកចិត្តនោះគឺការស៊ុតនៅនាទីទី៩០បូក២របស់កីឡាករ Seko Fofana បន្ទាប់ពីអូសដាច់ខ្សែការពាររបស់ Juventus ពីរអ្នក។

យោងតាមលទ្ធផលនេះ Juventus មិនទាន់ក្លាយទៅជាម្ចាស់ជើង Serie A រដូវកាលនេះនៅឡើយទេ ដោយកំពុងឈរនៅលើកំពូលតារាងតាមពីក្រោយដោយក្លិប Lazio ចំនួន៦ពិន្ទុ និងនៅសល់៣ប្រកួតទៀតទើបចប់រដូវកាលនេះ៕

ប្រភព៖ givemesport