ណាសាបញ្ចេញផែនទីមួយដែលបង្ហាញពីវត្តមានទឹកកកនៅខាងក្រោមផ្ទៃភពអង្គារ

អាមេរិក៖ ទឹកជាកត្តាមួយដ៏ចាំបាច់បំផុតនៅពេលយើងចង់ធ្វើការសិក្សារុករកកន្លែងផ្សេងទៀតក្រៅពីភពផែនដីសម្រាប់រស់នៅ។ ការរកឃើញវត្តមាននៃទឹកនៅលើភពផ្សេងជារឿងមួយដ៏ល្អព្រោះយើងអាចមានប្រភពទឹកសម្រាប់ការទទួលទានទ្រទ្រង់ជីវិត និងម្យ៉ាងទៀតសម្រាប់បង្កើតជាឥន្ធនៈប្រើប្រាស់ជាមួយគ្រាប់រ៉ុកកែត។

កាលពីពេលថ្មីៗនេះអង្គការណាសាបានបញ្ចេញផែនទីមួយដែលបង្ហាញប្រាប់អំពីទីតាំងនៃទឹកកកនៅលើភពអង្គារ ហើយអ្នកស្រាវជ្រាវបង្កើតផែនទីនេះឡើងដោយសារពួកគេជឿថាសមាសធាតុគីមីនៅតំបន់នោះអាចកកបាន។ នៅតំបន់មួយចំនួននៃភពអង្គារ ទឹកកកស្ថិតនៅក្រោមផ្ទៃភពត្រឹម ២.១សង់ទីម៉ែត្រតែប៉ុណ្ណោះ ហើយវាអាចជាឱកាសមួយសម្រាប់អ្នកស្រាវជ្រាវមកកាន់តំបន់នេះនៅពេលអនាគតបាន។

លោក Sylvain Piqueux ដែលធ្វើការនៅមន្ទីរពិសោធន៍ Jet Propulsion របស់ណាសាបានមានប្រសាសន៍ថាយើងមិនចាំបាច់ត្រូវការឡានជីករកទឹកកកទេ តែអ្វីដែលយើងត្រូវការគឺប៉ែលមួយប៉ុណ្ណោះ។ ការរកឃើញវត្តមានទឹកកកពិតជាមានសារៈសំខាន់ ពីព្រោះវាអាចជួយដល់បេសកកម្មដឹកនាំមនុស្សទៅភពអង្គារ និងអាចជួយកំណត់ទីតាំងសម្រាប់គម្រោងនានាដូចជាមូលដ្ឋានភពអង្គារដែលបានគ្រោងទុករបស់កម្មវិធី SpaceX ជាដើម។ ពិតណាស់យើងមិនអាចដឹកទឹកពីផែនដីមកកាន់ភពអង្គារសម្រាប់ការប្រើប្រាស់បានឡើយ ហេតុនេះហើយការរកឃើញប្រភពទឹកនៅលើភពអង្គារពិតជាអាចជួយសម្រួលបានយ៉ាងច្រើនដល់ការរស់រានមានជីវិតនៅទីនោះ។

ទោះជាយ៉ាងណាក៏ដោយដោយសារភពនេះមានបរិយាកាសស្តើង ទើបប្រភពទឹកភាគច្រើននៅលើផ្ទៃរបស់វាអាចហួតយ៉ាងឆាប់រហ័ស។ ជាមួយនឹងផែនទីថ្មីនេះអ្នកស្រាវជ្រាវមានប្លង់គោលមួយសម្រាប់កំណត់កន្លែងដែលត្រូវចាប់ផ្តើមបេសកកម្ម ហើយចុងក្រោយគឺការបញ្ជូនអវកាសយានិកទៅភពព្រះអង្គារ៕