ហុងកុង៖ ក្រុមជម្រើសជាតិកម្ពុជាមានភារកិច្ចមួយដ៏សំខាន់ ដោយត្រូវប្រកួតជាមួយនឹងក្រុមជម្រើសជាតិហុងកុង ក្នុងព្រឹត្តិការណ៍ FIFA World Cup វគ្គជម្រុះបឋមជុំទីពីរ នៅល្ងាចនេះវេលាម៉ោង៧ (ម៉ោងនៅកម្ពុជា) នៅពហុកីឡដ្ឋានហុងកុង ដែលមានការផ្សាយផ្ទាល់ដោយទូរទស្សន៍ CTN។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
មុនការប្រកួតទល់នឹងក្រុមហុងកុង លោក Felix G. Dalmas ដែលជាគ្រូវបង្វឹកក្រុមជម្រើសកម្ពុជាបាននិយាយក្នុងសន្និសីទកាសែតដែលធ្វើឡើងកាលពីថ្ងៃច័ន្ទម្សិលមិញនេះថា៖
"ក្រុមរបស់យើងបានត្រៀមខ្លួនបានល្អ និងរួចរាល់សម្រាប់ការប្រកួតនៅថ្ងៃស្អែក។យើងទើបតែបញ្ចប់ការប្រកួតមិត្តភាពជាមួយនឹងក្រុមម៉ុងហ្គោលលីដែលជាការប្រកួតមួយ ជួយដល់ការត្រៀមខ្លួនសម្រាប់ប្រកួតនេះ។"
លោក Felix បានបន្តទៀតថា៖
"ស្មារតីរបស់ក្រុមគឺល្អ មានឆន្ទៈមោះមុតចំពោះការប្រកួតជាមួយហុងកុងនៅថ្ងៃស្អែកយើងដឹងថាក្រុមទាំងពីរសុទ្ធតែត្រូវការ៣ពិន្ទុ ដូច្នេះក្រុមហុងកុងក៏ត្រៀមខ្លួនបានល្អដូចគ្នា។"
គួររម្លឹកផងដែរថាកាលពីជើងទី១ក្រុមជម្រើសជាតិកម្ពុជា ស្មើក្នុងដីជាមួយក្រុមជម្រើសជាតិហុងកុងក្នុងលទ្ធផល ១ទល់នឹង១ ហើយបច្ចុប្បន្នក្រុមកម្ពុជាយើងមានត្រឹម១ពិន្ទុ ក្នុងចំណោម៤ប្រកួត ឈរលេខ៥ក្នុងពូល C ខណៈពេលដែលក្រុមជម្រើសជាតិហុងកុង មាន២ពិន្ទុ ឈរចំណាត់ថ្នាក់លេខ៤៕
ប្រភព៖ សហព័ន្ធកីឡាបាល់ទាត់កម្ពុជា
Bong I.T