រាជធានីភ្នំពេញ ៖ បុរសអ៊ិស្លាម អាចមានសិទ្ធិយកប្រពន្ធបានចំនួន៤នាក់បើសិនជាមានលទ្ធភាព តែត្រូវតែមានយុត្តិធម៌ និងស្មើភាពគ្នា ។ នេះបើតាមការឲ្យដឹងពីខ្មែរអ៊ិស្លាម។ ក្នុងករណីដែលខ្វះខាត និងដាក់វេនគ្នាមិនស្មើ គឺយកប្រពន្ធបានតែមួយទេ ។ ទោះបីជាយ៉ាងណា គេឃើញខ្មែរអ៊ិស្លាម មិនទាន់មានបុគ្គលណាម្នាក់មានប្រពន្ធច្រើន ហើយចេញមុខទទួលស្គាល់ជាសាធារណៈឡើយ ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
លោកសាឡេះ ពិតអាពូតឡឹប ហាកឹម គីឡូម៉ែត្រលេខ៨ បានឱ្យកោះសន្តិភាពដឹងកាលពីពេល ថ្មីៗកន្លងមកថា តាមសាសនាអ៊ិស្លាម បានអនុញ្ញាតឱ្យបុរសដែលជាសាសនិកអ៊ិស្លាមមានសិទ្ធិយកប្រពន្ធបានចំនួន៤នាក់ តែត្រូវមានយុត្តិធម៌ ចែកឲ្យស្មើគ្នា ។ បើមិនដូចនោះទេ«បាប» យកបានតែមួយទេ ។ បើសិនប្រពន្ធស្លាប់មួយយកមួយទៀត យកបានច្រើន មិនមានបាបទេ ។
លោកហាកឹម វិហារគីឡូមែត្រលេខ៨ បានឱ្យដឹងទៀតថា «ទោះបីសាសនាអនុញ្ញាតឲ្យមានសិទ្ធិយកប្រពន្ធរហូតដល់៤ក៏ដោយ ពុំមានបងប្អូនខ្មែរអ៊ិស្លាមណាម្នាក់មានប្រពន្ធច្រើននោះទេ ។ កន្លងមកខ្មែរអ៊ិស្លាម បានប្រកាន់ និងគោរពនូវច្បាប់របស់រដ្ឋ »។
លោកឡឹប ម៉ាត់ អាយុ៨០ឆ្នាំ ជាអ្នកកាន់សាសនិកអ៊ិស្លាម រស់នៅភូមិទី៣ សង្កាត់ច្រាំងចំរេះទី២ ខណ្ឌឫស្សីកែវឱ្យដឹងថា បុរសអ៊ិស្លាម មានសិទ្ធិ យកប្រពន្ធ៤នាក់បានតាមទំនៀមទម្លាប់ តែអត់មួយទើបយកមួយទៀតបាន មិនអាចយកម្ដងសរុបទាំង៤នាក់បានទេ ។ បើមានលទ្ធភាពអាចយកបានរហូតដល់៥ក៏បានដែរ ឱ្យតែមានលទ្ធភាពចិញ្ចឹម គ្រប់គ្រាន់។ បើយកមកខ្វះមុខខ្វះក្រោយអត់បានទេ គឺមានបាប ។
ចំណែកលោកអាប់ ដុលឡោះ អាយុ៥៧ឆ្នាំ ជាអ្នកមើលការខុសត្រូវវិហារគីឡូម៉ែត្រលេខ ៧ ឲ្យដឹងថា តាមទំនៀមទម្លាប់នៃអ្នកកាន់សាសនាអ៊ិស្លាមបុរសមានសិទ្ធិយកប្រពន្ធ៣ទៅ៤នាក់ឱ្យតែចិញ្ចឹមរស់ និងស្មើភាពគ្នា យកមិនចោលនោះទេ បើពុំនោះទេ គឺបាប ។ មិនថា ជនជាតិណា នោះទេឲ្យតែកាន់សាសនាអ៊ិស្លាមមានសិទ្ធិយកប្រពន្ធ៤ ។
តាមប្រវត្តិមហាម៉ាត់ ដែលជាសាវ័ករបស់ព្រះអាល់ឡោះមានប្រពន្ធ ៥ ។ ចំណែកខ្មែរអ៊ិស្លាមកម្ពុជា មិនទាន់ឃើញនរណាម្នាក់យកប្រពន្ធ៤ ហើយរស់នៅជាមួយគ្នា ដោយស្មើភាពនោះទេ ។ ទោះបីជាយ៉ាងណាក្ដីពុំដឹងប្រាកដថា សាសនាអ៊ិស្លាមបានផ្តល់សិទ្ធិឲ្យបុរសយកប្រពន្ធ៤ពិត ឬយ៉ាងណាទេ នេះគឺគ្រាន់តែជាមតិយោបល់របស់បុគ្គលដែលកាន់សាសនាអ៊ិស្លាមប៉ុណ្ណោះ ៕
ប្រភព៖ កោះសន្តិភាព
Bong I.T