អេស្ប៉ាញ៖ ខ្សែប្រយុទ្ធ Karim Benzema បានបង្ហើបពីអារម្មណ៍ពិតថាកំលុងពេល Cristiano Ronaldo ស្នាក់នៅក្លិប Real Madrid គឺគេចាំបាច់ត្រូវលេងតម្រូវតាមស្ទាយ៍នៃការលេងរបស់ Ronaldo និងក្លាយជាខ្សែប្រយុទ្ធទី២ក្នុងក្រុម។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
Benzema និង Ronaldo ធ្លាប់លេងជាមួយគ្នាតាំងពីឆ្នាំ២០០៩ដល់ឆ្នាំ២០១៨ មុនពេល Ronaldo ចាកចេញពី Real Madrid និងផ្ទេរទៅ Juventus ។
កីឡាករទាំងពីររូបមានទំនាក់ទំនងល្អនឹងគ្នាប៉ុន្តែកាល Ronaldo ស្នាក់នៅ Real Madrid គឺ Benzema ពុំសូវលេចធ្លោនោះទេនិងត្រូវគេយកទៅប្រៀបធៀបថាដូចស្រមោលរបស់ម្ចាស់ពាន Ballon d'Or ប្រាំសម័យរូបនេះ។
យ៉ាងណាមិញ Benzema បានទម្លាយអារម្មណ៍ពិតថា៖
នៅពេលអ្នកលេងជាមួយកីឡាករដែលរកបាន៥០ទៅ៦០គ្រាប់ក្នុងមួយរដូវកាល គឺពិតណាស់ អ្នកត្រូវតែជួយជ្រោមជ្រែងក្រុម ក៏ដូចជាជួយយកអាសារកីឡាករ(Ronaldo) ផងដែរ។ ខ្ញុំត្រូវតែរៀនសម្របខ្លួន ខ្ញុំមានទំនាក់ទំនងល្អជាមួយគេ។ប៉ុន្តែពេលគេចាកចេញ តួនាទីត្រូវធ្លាក់មកលើខ្ញុំ ដែលត្រូវឈានជើងចេញមកបង្ហាញថាខ្ញុំក៏មានសមត្ថភាពដែរ។ ខ្ញុំដឹងថាខ្ញុំអាចផ្ដល់អ្វីខ្លះដល់ក្រុម។ ឥលូវនេះ ពួកយើងអាចនិយាយបានថា ខ្ញុំមានស្ថិតិល្អ។ពិតណាស់ ខ្ញុំរីករាយចំពោះការទទួលស្គាល់របស់អ្នកទាំងអស់គ្នា។ វាពិតជាធ្វើឲ្យខ្ញុំមានមោទកភាពណាស់ដែលអាចបង្ហាញវាចេញពីមួយ ទៅពីរ ទៅបី ឬបួនឆ្នាំ ជាបន្តបន្ទាប់។
គួរបញ្ជាក់ផងដែរថា នារដូវកាលនេះ ខ្សែប្រយុទ្ធ Karim Benzema រកបាន១១គ្រាប់ហើយឲ្យក្លិប Real Madrid៕
ប្រភព៖ sportskeeda
Bong I.T