ឮដំណឹងថា ភ្នាក់ងាររបស់ Pogba បានទាក់ទងទៅកាន់ក្លិបយក្សមួយនេះហើយ

អឺរ៉ុប៖ ក្រុមអ្នកមានបុណ្យ Barcelona ត្រូវគេរាយការណ៍ ត្រូវបានភ្នាក់ងាររបស់ខ្សែបម្រើ Paul Pogba គឺលោក Mino Raiola ធ្វើការទាក់ទងទៅ ដើម្បីពិភាក្សាអំពីការផ្ទេរពីក្រុមបិសាចក្រហម Manchester United ដែលអាចកើតឡើង នារដូវក្ដៅខាងមុខ។

យោងតាម ESPN បានឲ្យដឹងថា ក្លិប Barcelona ត្រូវបានលោក ​Raiola ទាក់ទងទៅ ដោយផ្ដល់ឳកាសក្នុងការចុះហត្ថលេខា Pogba ដោយឥតមានតម្លៃខ្លួន ពេលគេផុតកុងត្រានៅក្រុមបិសាចក្រហម។

របាយការណ៍បានអះអាងដែរថា កីឡាករឈ្នះជើងឯក World Cup ឆ្នាំ២០១៨ រូបនេះ មិនទាន់ធ្វើការសម្រេចចិត្ដអំពីអនាគតរបស់គេនៅឡើយ ខណៈដែលក្រុម Barcelona ក៏មិនទាន់ប្រាកដថា ពួកគេមានលទ្ធភាពផ្ដល់ប្រាក់ឈ្នួលផងដែរ ដោយសារតែវិបត្ដិហិរញ្ញាវត្ថុ។

គួរឲ្យដឹងដែរថា ខ្សែបម្រើវ័យ២៨ឆ្នាំរូបនេះ មិនទាន់ឈានដល់កិច្ចព្រមព្រៀងជុំវិញកិច្ចសន្យាថ្មី ជាមួយក្រុមលោក Ole Gunnar​ Solkjaer ទេ ខណៈក្រុមដែលក្រុមមានមូលដ្ឋាននៅទីក្រុង ​Manchester មួយនេះ បានត្រៀមផ្ដល់ប្រាក់ឈ្នួលរហូតដល់ ៤០ម៉ឺនផោន (ឬប្រមាណ៥៤ម៉ឺនដុល្លារ) ក្នុងមួយសប្ដាហ៍ឯណោះ លើកិច្ចសន្យាថ្មី៕

ប្រភព៖ sportsmole