របបអាហារប្រចាំថ្ងៃជះឥទ្ធិពលដ៏ធំធេងដល់ប្រព័ន្ធរាងកាយរបស់យើងទាំងមូល រួមទាំងសួតផងដែរ។ ពពួកផ្លែក្រូច បន្លែស្លឹកបៃតង ត្រីដែលមានខ្លាញ់ និងអាហារមិនកែច្នៃ ឬមិនបន្ថែមសារធាតុកែច្នៃ អាចផ្ដល់សារធាតុចិញ្ចឹមដែលចាំបាច់សម្រាប់សុខភាពសួតដ៏ល្អបំផុត ខណៈពេលដែលអាហារមួយចំនួនទៀត មានគុណប្រយោជន៍កាត់បន្ថយហានិភ័យនៃការឆ្លងមេរោគផ្លូវដង្ហើម ជួយឲ្យការដកដង្ហើមកាន់តែប្រសើរឡើង ក៏ដូចជាសម្អាតផ្លូវដង្ហើមយ៉ាងមានប្រសិទ្ធភាព។ របបអាហារតុល្យភាព ត្រូវរួមបញ្ចូលពពួកវីតាមីនសម្រាប់សុខភាពសួត ជាពិសេសនៅអំឡុងរដូវវស្សា។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស១. វីតាមីនC ជំរុញមុខងាររបស់សួត
វីតាមីនC មានសមត្ថភាពបង្កើនមុខងារប្រព័ន្ធភាពស៊ាំ និងជំរុញការផលិតខូឡាជែននៅក្នុងស្បែក។ សារធាតុចិញ្ចឹមមួយនេះក៏អាចជួយពង្រឹងមុខងារសួត និងកាត់បន្ថយរោគសញ្ញាផ្លូវដង្ហើមបានពាក់កណ្ដាល នៅអំឡុងពេល និងក្រោយពេលហាត់ប្រាណ។ អត្ថប្រយោជន៍សុខភាពទាំងនេះ ទទួលបានពីសារធាតុប្រឆាំងនឹងអុកស៊ីតកម្មនៅក្នុងវីតាមីនC។ ដូច្នេះហើយ ដើម្បីទទួលបានសារធាតុចិញ្ចឹមបន្ថែមនៅក្នុងរបបអាហារជំនួយដល់សុខភាពសួត គ្នាយើងគប្បីញ៉ាំវីតាមីនC ដែលមាននៅក្នុងពពួកផ្លែក្រូច ម្ទេស ត្របែក ឃីវី ខាត់ណាខៀវ និងពពួកផ្លែប៊ឺរី ជាដើម។
២. វីតាមីនE
សារធាតុប្រឆាំងនឹងអុកស៊ីតកម្មដ៏មានឥទ្ធិពលមួយទៀត គឺវីតាមីនE ដោយសារតែវីតាមីនមួយនេះអាចកាត់បន្ថយការរលាកបានយ៉ាងស័ក្ដិសិទ្ធិ។ ដើម្បីទទួលបានអត្ថប្រយោជន៍ពីវីតាមីនE យើងគួរញ៉ាំពពួកគ្រាប់ធញ្ញជាតិ និងគ្រាប់ផ្លែឈើ ប្រេងអូលីវ ប៉េងប៉ោះ ដំឡូងជ្វា ស្វាយ និងស្ពៃពួយឡេង។
៣. វីតាមីនD
គ្នាយើងមួយចំនួនប្រហែលជាធ្លាប់បានដឹងហើយថា វីតាមីនD អាចជួយឲ្យធ្មេញ និងឆ្អឹងរឹងមាំ ដោយគ្រប់គ្រងកម្រិតជាតិកាល់ស្យូម។ ប៉ុន្តែ សារធាតុចិញ្ចឹមមួយនេះ ក៏អាចប្រឆាំងនឹងការឆ្លងមេរោគផ្លូវដង្ហើម ព្រមទាំងកាត់បន្ថយហានិភ័យនៃជំងឺស្ទះផ្លូវដង្ហើមរ៉ាំរ៉ៃ (COPD) ផងដែរ។ ផ្ទុយទៅវិញ កង្វះវីតាមីនD អាចបង្កើនឱកាសនៃការកើតជំងឺហឺត ដកដង្ហើមលឺសូរត្បៀត ជំងឺរលាកទងសួត និងបញ្ហាផ្លូវដង្ហើមដទៃទៀត។ ពិតណាស់ រាងកាយរបស់យើងផលិតវីតាមីននេះដោយខ្លួនឯង នៅពេលប៉ះពាល់នឹងពន្លឺថ្ងៃ។ យ៉ាងណាមិញ អាហារមួយចំនួន ដូចជាត្រីធូណា ត្រីសាល់ម៉ុន អ័យស្ទ័រ និងស៊ុតផ្នែកពណ៌លឿងក៏មានប្រភពនៃវីតាមីនDដូចគ្នា។
ពង្រឹងមុខងារសួតតាមបែបធម្មជាតិ
ដើម្បីពង្រឹងមុខងារសួតឲ្យមានសុខភាពល្អ គ្នាយើងគប្បីផ្លាស់ប្ដូរបែបបទនៃការរស់នៅ ដោយធ្វើលំហាត់ប្រាណជាប្រចាំ រក្សាជាតិទឹកក្នុងរាងកាយ ញ៉ាំរបបអាហារដែលល្អសម្រាប់សុខភាពសួត ព្រមទាំងជៀសវាងការជក់បារី ឬស្រូបយកផ្សែងបារី និងសារធាតុពុលនៅក្នុងបរិយាកាស។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet
Bong I.T