អាមេរិក៖ មហាសេដ្ឋី លោក Marc Lore បានបង្ហាញពីចក្ខុវិស័យរបស់គាត់ ចំពោះទីក្រុងថ្មីមួយនៅអាមេរិក ដែលនឹងមានមនុស្ស៥លាននាក់រស់នៅ។ ឥឡូវនេះ គាត់គ្រាន់តែត្រូវការកន្លែងណាមួយ ដើម្បីសាងសង់វា និងថវិកាចំនួន៤០០ពាន់លានដុល្លារ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សលោកបានបង្ហាញផែនការសម្រាប់ទីក្រុង Telosa ប្រកបដោយនិរន្តរភាព ដែលគាត់សង្ឃឹមថា នឹងសាងសង់នៅលើវាលខ្សាច់អាមេរិក។ គម្រោងមហិច្ឆិតាទំហំប្រហែល៦០៧គីឡូម៉ែត្រក្រឡា សន្យាថាស្ថាបត្យកម្មមិនប៉ះពាល់ដល់បរិស្ថាន ការផលិតថាមពលប្រកបដោយនិរន្តរភាព និងប្រព័ន្ធទឹកដែលធន់នឹងគ្រោះរាំងស្ងួត។ ការរចនានេះនឹងអនុញ្ញាតឲ្យអ្នករស់នៅ អាចទៅដល់កន្លែងធ្វើការ សាលារៀន និងកន្លែងផ្សេងទៀត ត្រឹមរយៈពេល១៥នាទីនៃការធ្វើដំណើរពីផ្ទះរបស់ពួកគេ។
ទោះបីជាអ្នករៀបចំផែនការកំពុងស្វែងរកទីតាំងក៏ដោយ គោលដៅដែលអាចទៅរួចរួមមាន រដ្ឋ Nevada, Utah, Idaho, Arizona, Texas និងតំបន់ Appalachian នេះបើយោងតាមគេហទំព័រផ្លូវការរបស់គម្រោង។ ដំណាក់កាលដំបូងនៃការសាងសង់ដែលអាចផ្ទុកប្រជាជនចំនួន៥ម៉ឺននាក់ នៅលើផ្ទៃដីប្រហែល៦គីឡូម៉ែត្រក្រឡា មកជាមួយតម្លៃប៉ាន់ស្មានប្រហែល២៥ពាន់លានដុល្លារ។ គម្រោងទាំងមូលត្រូវបានគេរំពឹងថា នឹងលើសពី៤០០ពាន់លានដុល្លារ ដោយទីក្រុងនេះនឹងឈានដល់ចំនួនប្រជាជនគោលដៅ៥លាននាក់ ក្នុងរយៈពេល៤០ឆ្នាំ៕
ប្រភព: CNN