គ្មាន Messi និង Mbappe ទេ! មកដឹងពីកីឡាករ៥រូបដែលគេជឿជាក់ថាមានកម្លាំងជើងខ្លាំងបំផុត

អឺរ៉ុប៖ បាល់ទាត់ ជា កីឡាមួយប្រភេទដែលទទួលបានការពេញនិយមជាងគេនៅលើពិភពលោក ហើយ អ្នកគាំទ្រស្ទើរតែទាំងអស់តែងតែចង់ឃើញនូវគ្រាប់បាល់ស្អាត ជាពិសេសគ្រាប់បាល់ពីចម្ងាយពីសំណាក់កីឡាករដែលបានប្រើប្រាស់ថាមពលកម្លាំងជើងដ៏ខ្លាំងរបស់ពួកគេ។ ជាក់ស្តែងកម្លាំងជើងដ៏ខ្លាំងនេះទៀតសោតក៏អាចធ្វើឲ្យអ្នកចាំទីមានការភ័យរន្ធត់ផងដែរជាក់ស្តែងកាលពីមុនយើងឃើញមាន Roberto Carlos, Wesley Sneijder និង Hulk ជាដើមសុទ្ធតែមានកម្លាំងជើងខ្លាំង។

ខាងក្រោមនេះ យើងទៅមើលកីឡាករ៥រូបក្នុងពេលបច្ចុប្បន្នដែលមានកម្លាំងជើងខ្លាំងបំផុត៖

៥. Robert Lewandowski

Lewandowski ត្រូវបានគេចាត់ទុកជាខ្សែប្រយុទ្ធដែលល្អជាងគេមួយរូបនៅលើលោក ហើយ គ្រប់គ្នាបានដឹងហើយថា គេជាម៉ាសុីនរកគ្រាប់បាល់របស់ Bayern Munich។ កីឡាករសញ្ជាតិប៉ូឡូញរូបនេះអាចរកគ្រាប់បាល់ក្នុងគ្រប់ទម្រង់បានទាំងអស់ ជាពិសេសការស៊ុតពីលើតំបូលទូកដោយជើងស្តាំរបស់គេជាមួយនឹងកម្លាំងមហិមាទៅកាន់ជ្រុងនីមួយៗរបស់អ្នកចាំទី។

៤. Marcus Rashford

Rashford ជា កីឡាករដ៏លេចធ្លោម្នាក់របស់ Manchester United ដែលបណ្តុះចេញពីថ្នាលយុវជនរបស់ក្លិបផ្ទាល់ ហើយ កីឡាករសញ្ជាតិអង់គ្លេសរូបនេះជារឿយៗតែងតែស៊ុតបញ្ចូលទីបាល់ពីចម្ងាយបានយ៉ាងល្អ និង បាល់ Free-Kick ដ៏បុិនប្រសប់ផងដែរ។

៣. Kevin De Bruyne

De Bruyne ជា តួអង្គសំខាន់របស់ Manchester City ជាងប្រាំមួយរដូវកាល ហើយ ក្នុងនាមជាខ្សែបម្រើ គេមិនត្រឹមតែបញ្ជូនបាល់ឲ្យមិត្តរួមក្រុមនោះទេ គឺ គេក៏ពូកែក្នុងការស៊ុតបញ្ចូលទីផងដែរ ជាពិសេសបាល់ពីចម្ងាយៗទាំងជើងឆ្វេង និង ជើងស្តាំ។

២. Erling Haaland

Haaland ជា ខ្សែប្រយុទ្ធវ័យក្មេងដែលតែងតែមានភាពជឿជាក់រាល់ពេលដែលគេរៀបចំនឹងទាត់បាល់បញ្ចូលទី ហើយ​ គ្រប់គ្នាបានឃើញហើយមានគុណភាពបញ្ចប់ទីរបស់គេ ជាពិសេសកម្លាំហជើងដ៏ខ្លាំង ជាក់ស្តែងកាលពីរដូវកាលមុន កីឡាករសញ្ជាតិន័រវ៉េរូបនេះបង្ហាញខ្លួនបាន៤១ប្រកួត និង ស៊ុតបញ្ចូលទីបាន៤១គ្រាប់។

១. Cristiano Ronaldo

Ronaldo ជា កីឡាករម្នាក់ដែលតែងតែលងបន្លាចគ្រប់អ្នកចាំទីទាំងអស់នៅលើពិភពលោក ជាពិសេសគ្រាប់បាល់ស៊ុតទម្លាក់ពីក្រៅប្រអប់ដែលគេធ្លាប់ធ្វើរាប់រយគ្រាប់នៅក្នុងអាជីព ហើយ គ្រាប់បាល់ចម្ងាយ៣៥ម៉ែត្រ ជាដើម គេតែងតែធ្វើបានជារឿងៗ៕

ប្រភព៖ sportskeeda