Varane និយាយទាំងក្ដុកក្ដួល ពេលទៅលាប្រធានក្លិប និងមិត្ដរួមក្រុមដល់ទីលានហ្វឹកហាត់

អេស្ប៉ាញ៖ កីឡាករ ​Raphael Varane បានទៅជួបប្រធានក្លិប និងបានទៅទីលានហ្វឹកហាត់ក្រុម Real Madrid កាលពីថ្ងៃសុក្រ ដើម្បីលាមិត្ដរួមក្រុមរបស់ខ្លួន បន្ទាប់ពីព្រមព្រៀងផ្លាស់ទៅក្លិបបិសាចក្រហម Manchester United ។

កីឡាករសញ្ជាតិបារាំងរូបនេះ ត្រូវបានស្វាគមន៍ដោយប្រធានក្លិបស្ដេចសលោក Florentino Perez និងបានថតរូបរួមគ្នានៅពីមុខពានរង្វាន់របស់ក្រុម​ Real Madrid មុនពេលបន្ដដំណើរទៅទីលានហ្វឹកហាត់ Valdebebas ដើម្បីនិយាយពាក្យក្នុងចិត្ដទៅកាន់មិត្ដរួមក្រុម។

Varane មិនអាចទប់ទឹកភ្នែកបានទេនៅពេលនិយាយទៅកាន់មិត្ដរួមក្រុម អំពីពេលវេលាដ៏អស្ចារ្យ ដែលខ្លួនបានចំណាយជាមួយ Real Madrid តាំងពីឆ្នាំ ២០១១មក ហើយបានជូនពរឲ្យមិត្ដរួមក្រុមទាំងអស់សំណាងល្អនារដូវកាលក្រោយ។

ជាចុងក្រោយ កីឡាករ Marcelo, Lucas Vazquez, Fede Valverde, Toni Kroos, Alvaro Odriozola, Isco និងមិត្ដរួមក្រុមដទៃទៀត បានដើរទៅកាន់ Varane ដើម្បីនិយាយ និងឱបក្នុងន័យលាគ្នាម្ដងម្នាក់ៗផងដែរ៕

ប្រភព៖ marca