Dest បានបដិសេធសំណើពីក្លិបធំៗចំនួន៣ ព្រោះតែចង់លេងនៅ Barcelona បន្ដទៀត

អេស្ប៉ាញ៖ ខ្សែការពារស្លាបស្ដាំ Sergino Dest ត្រូវគេរាយការណ៍ថា បានបដិសេធសំណើពីក្លិបរបស់អឺរ៉ុបចំនួន៣ រួមមាន Arsenal, Bayern Munich និង Borussia Dortmund ព្រោះតែចង់លេងនៅក្លិប Barcelona បន្ដទៀត។ ទោះបីក្លិបយក្សអេស្ប៉ាញមួយនេះ មានបំណងកាត់ប្រាក់ខែរបស់កីឡាករ ដើម្បីអាចធានាបានក្នុងការបន្ដកិច្ចសន្យាថ្មី ឲ្យខ្សែប្រយុទ្ធ Lionel Messi ក៏ដោយ។

ទន្ទឹមនឹងនេះ គ្រូបង្វឹកក្រុម ​Barcelona លោក Ronald Koeman ក៏មានបំណងរក្សាទុក ​Dest ​ដូចគ្នា។ ដោយក្លិបជឿជាក់លើសក្ដានុពលរបស់កីឡាករវ័យ២០ឆ្នាំរូបនេះ ថានឹងអាចវិវឌ្ឍន៍ខ្លួនទៅជាកីឡាករខ្សែការពារស្ដាំលំដាប់លេខមួយរបស់ក្លិប ខណៈរូបគេក៏អាចបម្រុងទុកសម្រាប់ Jordi Alba ដែលលេងតំណែងការពារស្លាបឆ្វេងផងដែរ។

បច្ចុប្បន្ន Barcelona ក៏មានកីឡាករ Emerson Royal​, Sergio Roberto និង Oscar Mingueza ដែលអាចលេងក្នុងតំណែងរបស់ Dest ផងដែរ។

គួរឲ្យដឹងថា ខ្សែការពារសញ្ជាតិអាមេរិករូបនេះ បានបង្ហាញខ្លួ​នចំនួន ៤១លើកសម្រាប់រដូវកាលដំបូងនៅឯ ​Camp Nou ក្រោយបានផ្លាស់ពីក្លិប Ajax ក្នុងតម្លៃ ២៣លានផោន (ឬប្រមាណ ៣២លានដុល្លារអាមេរិក) កាលពីខែតុលា ឆ្នាំ២០២០៕

ប្រភព៖ dailymail