ស្រលាញ់ពេក! កីឡាករ Man UTD រូបនេះ ក៏កំពុងបញ្ចុះបញ្ចូល Pogba ឲ្យស្នាក់នៅបន្ដដែរ

អឺរ៉ុប៖ កីឡាករ ​Marcus Rashford កំពុងតែព្យាយាមបញ្ចុះបញ្ចូលខ្សែបម្រើ ​Paul Pogba ឲ្យស្នាក់នៅក្លិប Manchester United បន្ដទៀត ខណៈដែលកិច្ចសន្យារបស់កីឡាករសញ្ជាតិបារាំងរូបនេះ នៅសល់មួយឆ្នាំទៀតប៉ុណ្ណោះ ស្របពេលលេចឮថា PSG ក៏ចាប់អារម្មណ៍ចង់បានផងដែរ។

យោងតាមសារព័ត៌មាន The Sun បានឲ្យដឹងថា ​ Rashford គឺជាកីឡាករម្នាក់ក្នុងចំណោមកីឡាករមួយចំនួនទៀត ដែលបាននិយាយជាមួយ ​Pogba ដើម្បីលើកទឹកចិត្ដគេឲ្យបន្ដស្នាក់នៅ ​Manchester United ។

របាយការណ៍បានបញ្ជាក់ដែរថា មិត្ដរួមក្រុមរបស់ Pogba កំពុងធ្វើអ្វីៗគ្របយ៉ាងដើម្បីឲ្យពួកគេអាចបញ្ចុះបញ្ចូល Pogba ឲ្យស្នាក់នៅបន្ដ ព្រោះពួកគេជឿជាក់ថាខ្សែបម្រើរូបនេះ ជាកីឡាករសំខាន់ និងជាអ្នកនាំលេងមួយរូបនៅក្នុងក្រុម។

ជាមួយគ្នានេះ ការមកដល់របស់ Raphael Varane ដែលជាមិត្ដរួមជាតិរបស់ Pogba ក៏ទំនងអាចជួយឲ្យរូបគេផ្លាស់ប្ដូរចិត្ដផងដែរ។

គួរឲ្យដឹងថា Pogba បានបង្ហាញខ្លួនចំនួន ១៩៩ប្រកួតឲ្យក្រុមបិសាចក្រហម ដោយរកបាន ៣៨គ្រាប់ និងបញ្ជូនបាល់ឲ្យមិត្ដរួមក្រុមទាត់បាន ៤២លើក ចាប់តាំងពីផ្ទេរមកពី Juventus ក្នុងឆ្នាំ ២០១៦៕

ប្រភព៖ sportsmole