ស្ងាត់ៗបានមួយ! Chelsea កាន់តែកៀកក្នុងការនាំយកកីឡាកររូបនេះមកកាន់ទឹកដី Stamford Bridge

អង់គ្លេស៖ យោងតាមសារព័ត៌មាន Sky Sports គឺក្លិបតោខៀវ Chelsea នឹងនាំយកអ្នកចាំទី Marcus Bettinelli ពីក្លិប Fulham ដោយគ្មានតម្លៃខ្លួន។

Bettinelli បានចំណាយពេលនៅរដូវកាលមុនលេងខ្ចីជើងនៅក្លិប Middlesbrough ហើយដោយសារកុងត្រារបស់គេជាមួយ Fulham ទើបតែផុតកំណត់នៅថ្ងៃទី៣០ខែមិថុនាកន្លងទៅទើបកីឡាកររូបនេះមិនបន្តកុងត្រាថ្មីទេ។

Sky Sports បានបង្ហើបទៀតថា អ្នកចាំទីវ័យ២៩ឆ្នាំរូបនេះនឹងចូលមកធ្វើតេស្តសុខភាពនៅក្លិប Chelsea ឆាប់ៗនេះមុននឹងមានការប្រកាសជាផ្លូវការតាមក្រោយ។

គេស្មានទុកថា អ្នកចាំទីសញ្ជាតិអង់គ្លេសរូបនេះទំនងជាមិនបានក្លាយជាអ្នកចាំទីដែលចូលប្រកួតឲ្យ Chelsea ញឹកញាប់នោះឡើយ គឺអាចនឹងក្លាយជាអ្នកចាំទីដៃទី៣របស់ក្លិប។

អ្នកចាំទី Willy Caballero បានចាកចេញពីទឹកដី Stamford Bridge ទើប Bettinelli មកជំនួសគេវិញម្ដង៕

ប្រភព៖ caughtoffside