រាជធានីភ្នំពេញ៖ ផ្ទុះការភ្ញាក់ផ្អើលជាខ្លាំង
ក្រោយពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅថ្ងៃទី១៦ ខែ កក្ដដា ឆ្នាំ២០២១រសៀលនេះ បានប្រតិកម្មជាមួយលោក ឌុច សុវណ្ណារី ក្រោយពីលោក បានបង្ហោះសារមួយពាក់ព័ន្ធនឹងលោក ហុង ថែម
ដែលជាមន្ត្រីមួយរូប ដែលបានចូលរួមចំណែក កសាងប្រទេសតាំងពីបាតដៃទទេ នាឆ្នាំ១៩៧៩ មក។
បើតាមការបង្ហោះរបស់លោក ឌុច សុវណ្ណារី នៅលើបណ្តាញសង្គមហ្វេសប៊ុក
ក្រោយពីមរណភាពរបស់លោក ហុង ថែម ដូច្នេះថា៖
ថ្ងៃនេះ ខ្ញុំបានទទួលដំណឹងថា មនុស្សម្នាក់ដែលតែងតែអគតិចំពោះកូនចៅក៏ដូចជារូបខ្ញុំ បានលាចាកលោកទៅហើយ។ ដោយសារកូវីដ ខ្ញុំមិនបានចូលរួមជូនដំណើរទេ ហើយក៏សូមអហោសិកម្មជូនគាត់ ហើយសូមបួងសួង បើជាតិក្រោយ គាត់មានសំណាងបានកើតជាមនុស្ស សូមឱ្យមានចិត្តទូលាយ ដឹងខុសត្រូវជាងនេះ កុំត្រចៀកស្រាលដូចជាតិនេះទៀត។
ក្នុងនោះដែរ ត្រឹមរយៈពេលមួយថ្ងៃ ក្រោយពីលោក ឌុច សុវណ្ណារី បង្ហោះសារនេះរួច សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានចេញប្រតិកម្ម និងប្រកាសដកតំណែង លោក ឌុច សុវណ្ណារី ដែលជា រដ្ឋលេខាធិការ ក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច តែម្តង។
ក្នុងនោះ សម្តេចតេជោ ហ៊ុន សែន បានបង្ហោះសារដែលមានខ្លឹមសារដូច្នេះថា៖
ខ្ញុំបានចូលរួមរំលែកទុក្ខតាមរយៈលោកជំទាវ ម៉ែន សំអន ចំពោះមរណៈភាព បង ហុង ថែម ដែលជាមន្ត្រីមួយរូបបានរួមចំណែកកសាងប្រទេសតាំងពីបាតដៃទទេនាឆ្នាំ១៩៧៩។ ខ្ញុំមិននឹកស្មានដល់សោះថាខ្ញុំមានមន្ត្រីមួយរូបថ្នាក់រដ្ឋលេខាធិការបង្ហោះសារផ្ជាញ់ផ្ចាលចំពោះសព សូម្បីតែលោកជំទាវម៉ែន សំអន សុំអោយដកចេញក៏មិនព្រមដកដែរ។ខ្ញុំមិនអាចទុក លោក ឌុច សុវណ្ណារីអោយនៅជារដ្ឋលេខាធិការក្រសួងបានតទៅទៀតទេ គឺត្រូវដកចេញពីតំណែងព្រោះលោកមិនសាកសម្យជាមន្ត្រីដឹកនាំទៀតដោយខ្វះគុណធម៍៕
Bong I.T